'రోమాంచకం' గ్లింప్స్ రిలీజ్.. సందీప్ రెడ్డి వంగా సమర్పణలో కొత్త లవ్ స్టోరీ

భద్రకాళీ పిక్చర్స్, డైరెక్టర్ సందీప్‌రెడ్డి వంగా కాంబోలో భారీ పాన్ ఇండియా బ్లాక్ బస్టర్స్ వచ్చాయి. ఇప్పుడు ఈ కాంబోలో ఒక యంగ్ టీమ్‌తో ఫ్రెష్ లవ్ స్టోరీ మూవీ వస్తోంది. కొత్తదనంతో యూనిక్ లవ్ స్టోరీగా తెరకెక్కుతున్న ఆ చిత్రమే ‘రోమాంచకం’. ఈ సినిమాలో సుమంత్ ప్రభాస్, అనంతిక సనిల్‌కుమార్ జంటగా నటిస్తున్నారు.

ఈ చిత్రాన్ని సందీప్‌రెడ్డి వంగా సమర్పిస్తుండగా, ప్రణయ్‌రెడ్డి వంగా నిర్మిస్తున్నారు. నూతన దర్శకుడు వేణుగోపాల్‌రెడ్డి రూపొందిస్తున్నారు. ఈ సినిమా సెప్టెంబర్ 3న థియేట్రికల్ రిలీజ్‌కు రెడీ అవుతోంది. ఈ నేపథ్యంలో సోమవారం ఈ సినిమా గ్లింప్స్ రిలీజ్ చేశారు. ఈ గ్లింప్స్ హీరో, హీరోయిన్స్ మధ్య ఉన్న ప్రేమను, వారి మధ్య ఏర్పడిన దూరాన్ని చూపిస్తూ సాగింది.

‘అణువు అణువును ఉర్రూతలూపే ప్రణయ కల్లోలమే రోమాంచకం, ఊహకే అందని ఉవ్వెత్తునెగిసే ఉత్తుంగ తరంగమే రోమాంచకం..’ అంటూ గ్లింప్స్‌లో వచ్చిన లిరిక్స్ ఈ మూవీ ఎంత వైబ్రేటింగ్‌గా ఉండబోతుందో తెలియజేస్తోంది. సుమంత్ ప్రభాస్, అనంతిక జంట కెమిస్ట్రీ ఈ సినిమాకు హైలైట్‌గా నిలుస్తోంది. ఉపేంద్ర లిమయె, వెంకటేశ్ కాకుమాను, నరేంద్ర రవి, మణి, సోహన్ తదితరులు ముఖ్య పాత్రల్లో నటిస్తున్న ఈ చిత్రానికి డీవోపీ: పవన్ పప్పుల; మ్యూజిక్: వాసుకి వైభవ్.