హైదరాబాద్: జోగులాంబ గద్వాల్ జిల్లాలోని( Jogulamba Gadwal district) కోదండపూర్ గ్రామం సమీపంలో శుక్రవారం ఉదయం జాతీయ రహదారి 44పై ఒక కుటుంబం ప్రయాణిస్తున్న కారు ఆగి ఉన్న ట్రక్కును ఢీకొట్టడంతో విషాదం నెలకొంది. కర్నూలు - హైదరాబాద్‌లను కలిపే రహదారిపై ఆగి ఉన్న ట్రక్కులో యాంత్రిక లోపం ఏర్పడింది. కర్నూల్ నుండి హైదరాబాద్‌(Kurnool to Hyderabad)కు వెళ్తుండగా ఆగి ఉన్న ట్రక్కును వేగంగా దూసుకొచ్చిన కియా కారు అదుపుతప్పి ఢీకొట్టింది. ప్రమాదం జరిగిన సమయంలో కారులో నలుగురు ప్రయాణికులు ఉన్నారు. వెంకట బాబ్జీ, అతని భార్య శ్రావణి, కుమార్తెలు సాయి చరిత్ర, లక్ష్మి. కారు బలంగా ఢీకొట్టడంతో శ్రావణి, సాయి చరిత్ర అక్కడికక్కడే మరణించగా, మిగిలిన ఇద్దరు తీవ్రంగా గాయపడ్డారు. 

క్షతగాత్రులను ప్రభుత్వ ఆసుపత్రికి తరలించారు. బాధిత కుటుంబం హైదరాబాద్‌కు చెందినవారని గుర్తించారు. స్థానికుల సమాచారంతో ఘటనాస్థలికి చేరుకున్న పోలీసులు కేసు నమోదు చేసుకుని మృతదేహాలను పోస్టుమార్టం నిమిత్తం మార్చురీకి తరలించారు. అనంతరం దర్యాప్తు చేస్తున్నామని పోలీసులు తెలిపారు. ఇదే సమయంలో, పొరుగున ఉన్న నారాయణపేట జిల్లాలో జరిగిన మరో సంఘటనలో శుక్రవారం తెల్లవారుజామున గొల్లపల్లి క్రాస్ రోడ్ల సమీపంలో ఇసుక రవాణా చేస్తున్న ట్రక్కు బైకర్ ను ఢీకొట్టింది. బాధితుడు మఖ్తల్ మండలం మంథన్ గౌడ్ గ్రామానికి చెందినవాడు. ఇసుకతో నిండిన ట్రక్కును చట్టవిరుద్ధంగా నడుపుతున్నారని, వేగంగా నడపడం వల్లే ప్రమాదం జరిగిందని గ్రామస్తులు ఆరోపించారు.