స్టార్ హీరో సూర్య ప్రస్తుతం తన 46వ సినిమాలో నటిస్తున్నారు. దర్శకుడు వెంకీ అట్లూరి దీన్ని తమిళ-, తెలుగు ద్విభాషా చిత్రంగా తెరకెక్కిస్తున్నారు. సితార ఎంటర్‌టైన్‌మెంట్స్, ఫార్చ్యూన్ ఫోర్ సినిమాస్ పతాకాలపై సూర్యదేవర నాగవంశీ, సాయిసౌజన్య నిర్మిస్తున్నారు. భారీ స్థాయి కుటుంబ కథా చిత్రంగా తెరకెక్కుతున్న ఈ సినిమాలో మమిత బైజు, రాధిక శరత్ కుమార్, రవీనా టాండన్ తదితరులు కీలక పాత్రలు పోషిస్తున్నారు.

ఇప్పటికే చిత్రీకరణ పూర్తి చేసుకున్న ఈ సినిమా జూలైలో విడుదల కానుంది. త్వరలోనే టీజర్ కూడా రానుంది. అంతకన్నా ముందు మేకర్స్ ఈ మూవీ నుంచి అప్‌డేట్ ఇచ్చారు. ఇప్పటివరకు ‘సూర్య46’ అనే వర్కింగ్ టైటిల్‌తో ప్రచారంలో ఉన్న ఈ సినిమాకు తాజాగా పేరు ఖరారైంది. ‘విశ్వనాథ్ & సన్స్’ అనే టైటిల్‌తో ఈ సినిమా రానున్నట్టు మేకర్స్ ప్రకటించారు. ఈ మేరకు ఫస్ట్‌లుక్‌ను విడుదల చేశారు. ఈ రెండు పోస్టర్లలో కథానాయకుడు సూర్య ఒక చిన్నారితో కనిపించారు. ఈ చిత్రానికి సంగీతం: జీవీ ప్రకాశ్‌కుమార్; ఛాయాగ్రహణం: నిమిష్ రవి; కూర్పు: నవీన్ నూలి; కళ: బంగ్లాన్.