విజయ్ దేవరకొండ కథానాయకుడిగా నటించిన ‘కింగ్‌డమ్’ చిత్రం అన్నివర్గాల ప్రేక్షకులను అలరిస్తూ భారీ వసూళ్లను రాబడుతోంది. గౌతమ్ తిన్ననూరి దర్శకత్వం వహించిన ఈ చిత్రంలో సత్యదేవ్, భాగ్యశ్రీ బోర్సే, వెంకటేశ్ ముఖ్య పాత్రలు పోషించారు. సూర్యదేవర నాగవంశీ, సాయిసౌజన్య నిర్మించిన ఈ సినిమా జూలై 31న విడుదలైంది. ప్రస్తుతం థియేటర్లలో సందడి చేస్తూ విమర్శకుల ప్రశంసలతోపాటు, ప్రేక్షకులను మెప్పు పొందుతోంది. ఈ చిత్రానికి ప్రేక్షకుల నుంచి వస్తున్న విశేష స్పందన నేపథ్యంలో హీరో విజయ్ దేవరకొండ తాజాగా పాత్రికేయులతో ముచ్చటించారు. ఈ సందర్భంగా ఆయన పలు ఆసక్తికర విషయాలను పంచుకున్నారు.

“కింగ్‌డమ్’ సినిమాకు ప్రేక్షకుల నుంచి వస్తున్న స్పందన చూస్తుంటే చాలా చాలా సంతోషంగా ఉంది. కేవలం తెలుగు రాష్ట్రాల్లోనే కాకుండా.. ఇతర రాష్ట్రాలు, ఓవర్సీస్‌లోనూ విశేష స్పందన లభిస్తోంది. ముఖ్యంగా మలయాళంలో ఈ స్థాయి స్పందన ఊహించలేదు. మలయాళ వెర్షన్ విడుదల చేయకపోయినా.. అక్కడి ప్రేక్షకులు ఇంతటి ప్రేమ చూపించడం చాలా ఆనందంగా ఉంది. 

కెరీర్ ప్రారంభంలో సినిమా హిట్ అయితే సెలెబ్రేట్ చేసుకోవాలనే ఆలోచన ఉండదు. ఎందుకంటే ఒక సినిమా హిట్ అయితే ఇంకో సినిమా చేసే అవకాశం వస్తుందని ఆశ ఉంటుంది. ‘పెళ్లిచూపులు’ హిట్ అయినప్పుడు ఇంకొన్ని అవకాశాలు వస్తాయని ఆనందపడ్డాను. కానీ, ఇప్పుడు అలా కాదు. సినిమా హిట్ అయితే ఆనందం కంటే కూడా మరింత మంచిగా సినిమాలు చేయడంలో ఇంకా బాధ్యత పెరుగుతుంది. 

గౌతమ్ కుటుంబ బంధాలను, ఎమోషన్స్‌ను డీల్ చేసే విధానం నాకు ఇష్టం. అన్నదమ్ముల అనుబంధం నేపథ్యంలో గ్యాంగ్‌స్టర్ డ్రామా అనే ఐడియా ఆయన చెప్పినప్పుడు నాకు చాలా ఆసక్తికరంగా అనిపించింది. జెర్సీ లాంటి ఎమోషనల్ జర్నీలో కూడా మనకు హై ఇచ్చే మూమెం ట్స్ ఉంటాయి. గౌతమ్‌కు ప్రతి విషయం మీద పట్టు ఉంటుం ది. హీరో పాత్ర, షాట్ కంపోజిషన్, మ్యూజిక్ ఇలా ప్రతిదాని మీద ఎంతో శ్రద్ధ తీసుకుంటాడు. కింగ్‌డమ్ కోసం ఆసక్తికర కథనం రాశాడు. ఇందులో ఏదో యాక్షన్ సన్నివేశం పెట్టాలి కదా అన్నట్టుగా ఎక్కడా పెట్టలేదు. దాని చుట్టూ బలమైన ఎమోషన్ ఉండేలా చూసుకున్నాడు.

ఈ కథలో చాలా లేయర్స్ ఉన్నాయి. అన్నదమ్ముల అనుబంధం నేపథ్యంలో ప్రధానంగా కథ ఉంటుంది. కానీ, ఇందులో దేశభక్తికి సంబంధించిన అంశముంది. ఒక తెగకు చెందిన నాయకుడి గురించి ఉంటుంది. అందుకే ఈ సినిమాకు తొలుతు ‘నాగ దేవర’ అనే టైటిల్ అనుకున్నాం. కానీ ఎన్టీఆర్ అన్న ‘దేవర’ కోసం ఆ టైటిల్ వదులుకున్నాం. 

ఇన్ని అంశాలను ఒకే భాగంలో చెప్పడం సాధ్యం కాదు. అందుకే రెండు భాగాలుగా చెప్పాలని నిర్ణయించుకున్నాం. ఒక కానిస్టేబుల్ కథతో మొదలై రాజు అవడంతో తొలి భాగం ముగిసింది. తన అన్న శివ కోసం సూరి చేసిన ప్రయాణాన్ని మొదటి భాగంలో చూశాం. రెండో భాగానికి సంబంధించి గౌతమ్ దగ్గర గొప్ప ఆలోచనలున్నాయి. మొదటి భాగంతో పోలిస్తే రెండో భాగం ఇంకా అద్భుతంగా ఉండబోతుంది. 

గౌతమ్ కథ చెప్పినప్పుడు ఓటింగ్ వేసే సన్నివేశాల గురించి ప్రస్తావించాడు కానీ, ఆ ప్రాసెస్ ఎలా ఉంటుందో వివరించలేదు. ఆ తర్వాత ఇలా గన్‌లు, కత్తుల వంటి ఆయుధాలతో ఓటింగ్ ఉంటుందని చెప్పినప్పుడు కొత్తగా అనిపించింది. ఆ కొత్తదనమే ప్రేక్షకుల మెప్పు పొందడానికి కారణమైందనిపిస్తోంది. 

ఈ చిత్రంలో నేను షిప్‌ను లాగే సీన్ మే నెలలో మండుటెండలో షూట్ చేశాం. ఇప్పుడు ప్రేక్షకులు ఆ సీన్ గురించి గొప్పగా మాట్లాడటం చాలా సంతోషాన్ని ఉంది. ప్రేక్షకులు, అభిమానులు ఈ సినిమాపై కురిపిస్తున్న ప్రేమనే నా దృష్టిలో బెస్ట్ కాంప్లిమెంట్. చాలా రోజుల తర్వాత అభిమానుల కళ్లల్లో ఆనందాన్ని చూశాను. 

ఈ కథ విన్న తర్వాత అసలు ఆ కాలంలో ఎలా మాట్లాడేవారు, ఎలాంటి దుస్తులు వేసుకునేవారు వంటి విషయాలు తెలుసుకోవడం మొదలుపెట్టాను. రిఫరెన్స్ కోసం పలు వెబ్ సిరీస్‌లు చూశాను. లుక్ పరంగానూ మరింత దృఢంగా కనిపించే ప్రయత్నం చేశాను. ఒక నటుడిగా ఎప్పుడూ ఫిట్‌గా ఉండటానికి ఇష్టపడతాను. అయితే ఇందులో అన్నను తిరిగి తీసుకురావడం కోసం ఆ సామ్రాజ్యంలోకి అడుగుపెట్టే సమయంలో బల్క్‌గా కనిపించాలనే ఉద్దేశంతో దాదాపు ఆరు నెలలు ప్రత్యేక కసరత్తులు చేశాను. 

నేను ఏ డైలాగ్ చెప్పినా యాసలో ఉందంటున్నారు. ‘కల్కి’లో నాగ్ అశ్విన్ రాసిన డైలాగ్‌నే చెప్పాను. ఏం చేస్తాం. దేవుడు నాకిచ్చిన గొంతు అది. అసలు అర్జునుడు మాతృభాష ఏంటి? ఎలా మాట్లాడతాడు? ఏమైనా రిఫరెన్సులు ఉంటాయా? ప్రతి విషయంలోనూ యాస గురించి మాట్లాడితే నేనేం చెప్పనూ?!  

సినిమా చూసి డైరెక్టర్ సుకుమార్ ఫోన్ చేశారు. తనకు ఎంతగానో నచ్చిందని చెప్పారు. ఆయనంటే నాకెంతో ఇష్టం. ఆయన నుంచి ప్రశంస రావడం ఎంతో ఆనందాన్నిచ్చింది. ‘అర్జున్‌రెడ్డి’ సమయం నుంచే నేను, సుకుమార్ కలిసి సినిమా చేయాలనుకుంటున్నాం. ఆయనకు కూడా నేనంటే ఇష్టం. భవిష్యత్‌లో మా కలయికలో సినిమా వస్తుందని ఆశిస్తున్నా. ఇప్పుడైతే నా దృష్టి అంతా నా చేతిలో ఉన్న సినిమాలపైనే ఉంది. 

తదుపరి సినిమా రాహుల్ సాంకృత్యాయన్ దర్శకత్వంలో చేస్తున్నా. నా సినీ జీవితంలో మొదటిసారి రాయలసీమ నేపథ్యంలో చేస్తున్న చిత్రమిది. నాకు సీమ యాస అంటే చాలా ఇష్టం. అనంతరం రవికిరణ్ కోలా దర్శకత్వంలో ఓ సినిమా చేయనున్నా. ఆంధ్రా నేపథ్యంలో సరికొత్త కథతో ఆ చిత్రం ఉంటుంది. రాహుల్, రవి.. ఇద్దరూ ఎంతో ప్రతిభగల దర్శకులు. ఇద్దరూ అద్భుతమైన కథలను సిద్ధం చేశారు.