యుద్ధ రక్కసి ఉక్కుపాదాల కింద 

ప్రపంచం నలుగుతున్నది

మానవత్వం మౌనంగా 

కన్నీటి ధారగా శోకిస్తున్నది

యుద్ధోన్మాదం జడలు విప్పుకొని నర్తిస్తున్నది

ఈ యుద్ధ తాండవంలో

 సామాన్యులే సమిదలు

ఎవరి కోసం యుద్ధం? 

ఎందుకోసం యుద్ధం ?

బాల్యం బూడిదై పోతుంటే 

ఈ ధరిత్రి హర్షిస్తుందా ?

చిరునవ్వులు మాయమైపోతుంటే

రాలిన బాలల నవ్వులు 

తిరిగి విరబూస్తాయా?

వారింట వెలుగులు ప్రసరిస్తాయా?

విద్వేషాలు విత్తిన నేలపై ఎప్పటికీ 

శాంతి పూలు పూయవు !

అక్కడ.. శవాల కమురు వాసనే విహరిస్తుంది

శ్మశాన నిశ్శబ్దమే రాజ్యమేలుతున్నది

మనవాళి మనగడ ప్రశ్నార్థకమతున్నది

చివరకు యుద్ధంలో గెలిచేది 

బలవంతుల పంతాలు మాత్రమే!

ప్రపంచానికిప్పుడు కావాల్సింది.. 

ఓదార్పు కాదు.. శాంతి

మానవత్వం పరిమళించిన 

హృదయాలు ఇప్పుడొక్కటవ్వాలి

ఆ మనసులు మాత్రమే 

విశ్వశాంతికి పాదులు వేస్తాయి

ఆధిపత్యాన్ని కాదు.. అనురాగాన్ని గెలిపిస్తాయి !!