ఎక్కడ మనసు భయం లేకుండా ఉంటుందో!

ఎక్కడ మనసు- భయం లేకుండా ఉంటుందో

ఎక్కడ మనిషి తలయెత్తుకుని బతుకుతాడో

ఎక్కడ జ్ఞానం స్వేచ్ఛగా వర్ధిల్లుతుందో

ఎక్కడ ప్రపంచం ఇరుకైన ఇంటి బంధాల గోడలతో

ముక్కలు ముక్కలుగా విడిపోవడం లేదో

ఎక్కడ మాటలు- సత్యం గుండె లోతు 

నుంచి బయటకు వస్తాయో

ఎక్కడ అలుపులేని శ్రమ

సంపూర్ణత వైపు చేతులను చాస్తుందో

ఎక్కడ తర్కవివేక నిర్మల స్రవంతి-

అంధాచారాల నిస్తేజ 

నిరాశాజనితపు ఎడారి యిసుకలోనికి 

దారి కోల్పోయి వెళ్లిపోదో

ఎక్కడ నీ మనసు-

ఎప్పుడూ విశాలమవుతూ

విస్తరిస్తుండే ఆలోచనలతో

వాటి ఆచరణలతో ముందుకు వెళుతుందో

ఆ స్వేచ్ఛామయస్వర్గంలోకి

ఓ జగత్పితా, నా దేశాన్ని మేల్కోనివ్వు!!

‘రఘువర్మ’

ఆంగ్లమూలం: 

రవీంద్రనాథ్ ఠాగూర్ 

(వేర్ ది మైండ్ ఈజ్)