హైదరాబాద్‌కే అభివృద్ధి పరిమితమా? : మహేశ్ గౌడ్
తెలంగాణ ఆదాయంలో 40 శాతం నగరం నుంచే.. ప్రాంతీయ అసమానతలు తొలగించాలి
హైదరాబాద్: తెలంగాణ అభివృద్ధి అన్ని ప్రాంతాలకు సమానంగా చేరినప్పుడే రాష్ట్ర ఏర్పాటు లక్ష్యం నెరవేరుతుందని టీపీసీసీ అధ్యక్షుడు మహేశ్ కుమార్ గౌడ్(TPCC President Mahesh Kumar Goud) అభిప్రాయపడ్డారు. భారత్ సమిట్‌లో భాగంగా నిర్వహించిన ‘తెలంగాణ రైజింగ్ – ఎకనామిక్ జస్టిస్’ చర్చా వేదికపై ఆయన మాట్లాడారు. రాష్ట్రంలోని అన్ని జిల్లాలకు పారిశ్రామిక అవకాశాలు విస్తరించాల్సిన అవసరాన్ని వివరించారు.
హైదరాబాద్‌కే అధిక ఆదాయం
రాష్ట్ర ఆదాయంలో దాదాపు 40 శాతం హైదరాబాద్ నుంచే సమకూరుతోందని మహేశ్ కుమార్ గౌడ్(Mahesh Kumar Goud) పేర్కొన్నారు. ఇది ఇతర ప్రాంతాల్లో అభివృద్ధి అవకాశాలను మరింత విస్తరించాల్సిన అవసరాన్ని సూచిస్తోందన్నారు. ఆదిలాబాద్, ములుగు, నారాయణపేట వంటి వెనుకబడిన జిల్లాల్లోనూ పరిశ్రమలు ఏర్పాటు చేసి స్థానికంగా ఉపాధి అవకాశాలు కల్పించాలని సూచించారు.
ఆర్థిక న్యాయమే లక్ష్యం
సమాన అభివృద్ధి, ఉద్యోగ అవకాశాల కల్పన ప్రధాన లక్ష్యాలుగా తెలంగాణ రాష్ట్రం ఏర్పడిందని ఆయన గుర్తుచేశారు. సంపద, పెట్టుబడులు, పరిశ్రమలు కొద్ది ప్రాంతాలకే పరిమితం కాకుండా అన్ని జిల్లాలకు విస్తరించాలని పేర్కొన్నారు.
కేంద్రంపై విమర్శలు
ప్రధాని నరేంద్ర మోదీ నేతృత్వంలోని కేంద్ర ప్రభుత్వం సంపన్న వర్గాలకు ఎక్కువ ప్రాధాన్యత ఇస్తోందని మహేశ్ గౌడ్ విమర్శించారు. రాష్ట్రంలో అమలవుతున్న సంక్షేమ పథకాల పట్ల ప్రజలు సంతృప్తిగా ఉన్నారని తెలిపారు. మరోవైపు సోషల్ మీడియా వేదికగా ప్రతిపక్షాలు తప్పుడు ప్రచారాలకు పాల్పడుతున్నాయని ఆరోపించారు.
