ఇక సెలవు.. సజ్జనార్ ఎమోషనల్ పోస్ట్!

సీపీగా చివరి వీడియో.. సజ్జనార్ ఏమన్నారంటే?

హైదరాబాద్: హైదరాబాద్ పోలీస్ కమిషనర్‌గా తన బాధ్యతలకు వీడ్కోలు పలుకుతూ వీసీ సజ్జనార్ భావోద్వేగ సందేశాన్ని పంచుకున్నారు. చారిత్రక నగరానికి ఏడాది పాటు సేవ చేసే అవకాశం తన జీవితంలో మర్చిపోలేని అనుభూతిగా మిగిలిందని తెలిపారు. ఈ మేరకు సోషల్ మీడియా వేదికగా ఒక Video Post విడుదల చేస్తూ.. ప్రభుత్వానికి, ముఖ్యమంత్రి రేవంత్ రెడ్డికి, నగర ప్రజలకు ప్రత్యేక కృతజ్ఞతలు చెప్పారు. హైదరాబాద్ పోలీస్ కమిషనర్‌గా పనిచేసిన కాలంలో ప్రజల నుంచి లభించిన ఆదరణ, సహకారం ఎప్పటికీ గుర్తుండిపోతాయని సజ్జనార్ పేర్కొన్నారు. మత సామరస్యానికి ప్రతీకగా నిలిచే హైదరాబాద్‌లో అన్ని వర్గాల ప్రజలు పండుగలను ప్రశాంతంగా జరుపుకోవడం తనకు ఎంతో సంతోషాన్ని ఇచ్చిందన్నారు. నూతన పోలీస్ కమిషనర్‌గా బాధ్యతలు చేపట్టనున్న మహేష్ భగవత్‌కు అభినందనలు తెలియజేశారు.

కల్తీ ఆహారంపై ఉక్కుపాదం.. సైబర్ నేరాలపై ప్రత్యేక ఆపరేషన్

తన పదవీకాలంలో చేపట్టిన పలు కీలక కార్యక్రమాలను సజ్జనార్ గుర్తుచేసుకున్నారు. ప్రజల ఆరోగ్యానికి ముప్పుగా మారిన కల్తీ ఆహారంపై H-FAST ద్వారా ప్రత్యేక చర్యలు చేపట్టామని తెలిపారు. భారీ స్థాయిలో కల్తీ ఆహార పదార్థాలను స్వాధీనం చేసుకుని, బాధ్యులపై చర్యలు తీసుకున్నట్లు వివరించారు. ఈ కార్యక్రమంలో Food Safety అధికారుల సహకారాన్ని ప్రశంసించారు. అలాగే పెరుగుతున్న Cyber Crimes ను అరికట్టేందుకు బ్యాంకులు, Department of Telecommunications (DoT), ఇతర విభాగాలతో సమన్వయం చేసుకుంటూ Operation Octopus ప్రారంభించినట్లు వెల్లడించారు. ఈ ప్రయత్నాలకు కేంద్ర ప్రభుత్వం నుంచి ప్రశంసలు లభించడం హైదరాబాద్ పోలీసులకు గర్వకారణమని పేర్కొన్నారు. బాధితులకు త్వరితగతిన న్యాయం అందించేందుకు Investigation Monitoring Cell ఏర్పాటు చేసిన విషయాన్ని కూడా ప్రస్తావించారు.

ట్రాఫిక్ నుంచి మహిళల భద్రత వరకు..

నగరంలో చాలాకాలంగా పెండింగ్‌లో ఉన్న ట్రాఫిక్ సమస్యల పరిష్కారానికి కూడా ప్రత్యేక చర్యలు చేపట్టినట్లు సజ్జనార్ తెలిపారు. KBR Park చుట్టూ One-Way Traffic విధానాన్ని GHMC కమిషనర్, ఇతర అధికారుల సహకారంతో అమలు చేసి వాహనదారులకు ఉపశమనం కలిగించామన్నారు. మహిళల భద్రత కోసం Spandana వాహనాలను అందుబాటులోకి తీసుకొచ్చినట్లు వివరించారు. ప్రభుత్వ పాఠశాలల విద్యార్థుల్లో పోలీసుల పట్ల స్నేహభావం, సమాజం పట్ల బాధ్యత పెంపొందించేందుకు ప్రారంభించిన Day With CP కార్యక్రమం తనకు ప్రత్యేకమైన సంతృప్తినిచ్చిందన్నారు. పోలీసు సిబ్బంది పనితీరును గుర్తించేందుకు Extra Mile, వారి ఆరోగ్య పరిరక్షణ కోసం Grand Health Challenge వంటి కార్యక్రమాలను చేపట్టినట్లు గుర్తుచేశారు.

పోలీసు కుటుంబానికి ప్రత్యేక ధన్యవాదాలు

తన పదవీకాలంలో సాధించిన విజయాల వెనుక ప్రతి పోలీసు సిబ్బంది కృషి ఉందని సజ్జనార్ పేర్కొన్నారు. శాంతిభద్రతలు, Traffic, Task Force, CAR, SB, CCRB సహా వివిధ విభాగాల్లో పనిచేసిన సిబ్బంది, హోంగార్డుల నుంచి ఉన్నతాధికారుల వరకు అందరికీ కృతజ్ఞతలు తెలిపారు. విధి నిర్వహణలో తమ కుటుంబాలను సైతం పక్కనపెట్టి నిరంతరం శ్రమించిన పోలీసు సిబ్బంది, వారి కుటుంబాలు సంతోషంగా ఉండాలని ఆకాంక్షించారు. తనకు మార్గదర్శనం చేసిన DGP, ఇతర ఉన్నతాధికారులతో పాటు వార్తలను ప్రజలకు చేరవేసిన Print and Electronic Media ప్రతినిధులకు ధన్యవాదాలు చెప్పారు. హైదరాబాద్ ప్రజలు ఎల్లప్పుడూ సురక్షితంగా, సంతోషంగా ఉండాలని కోరుకుంటూ.. ఎన్నో మధుర జ్ఞాపకాలతో హైదరాబాద్ పోలీస్ కమిషనర్‌గా సెలవు తీసుకుంటున్నట్లు తన సందేశాన్ని ముగించారు.

హైదరాబాద్ సీపీగా ఇక సెలవు గడచిన ఏడాది కాలం నా జీవితంలో ఎప్పటికీ మర్చిపోలేని ఒక అపురూపమైన ప్రయాణం. చారిత్రక హైదరాబాద్ పోలీస్ కమిషనర్‌గా సేవ చేసే అవకాశాన్ని కల్పించిన తెలంగాణ రాష్ట్ర ప్రభుత్వానికి, గౌరవ ముఖ్యమంత్రి శ్రీ రేవంత్ రెడ్డి గారికి నా హృదయపూర్వక ధన్యవాదాలు. అలాగే, హైదరాబాద్ నూతన పోలీస్ కమిషనర్‌గా బాధ్యతలు స్వీకరించబోతున్న శ్రీ మహేష్ భగవత్, ఐపీఎస్ గారికి నా తరఫున మనస్ఫూర్తిగా అభినందనలు, శుభాకాంక్షలు. ఈ ఏడాది కాలంలో నగర ప్రజలు నాపై, మా పోలీస్ వ్యవస్థపై చూపిన ప్రేమాభిమానాలు వెలకట్టలేనివి. మేము చేపట్టిన ప్రతి సంస్కరణనూ తమ సొంత కార్యక్రమంగా భావించి ఎంతగానో ఆదరించిన ప్రజలందరికీ పేరుపేరునా ధన్యవాదాలు తెలుపుతున్నాను. మత సామరస్యానికి ప్రతీక మన హైదరాబాద్. ప్రజలంతా కలిసిమెలిసి, శాంతిభద్రతలకు ఎలాంటి విఘాతం కలగకుండా ప్రతి పండుగనూ ఘనంగా జరుపుకున్న తీరు నా మనసును ఎంతగానో కదిలించింది. ప్రజల క్షేమమే పరమావధిగా మేము అనేక అడుగులు వేశాం. ముఖ్యంగా ప్రజల ప్రాణాలతో చెలగాటమాడే ఆహార కల్తీపై ‘హెచ్-ఫాస్ట్’ ద్వారా ఉక్కుపాదం మోపాం. భారీ ఎత్తున కల్తీ ఆహారాన్ని సీజ్ చేసి, నిందితులను కటకటాల వెనక్కి నెట్టే ప్రయత్నంలో మాకు అండగా నిలిచిన ఫుడ్ సేఫ్టీ అధికారులకు కృతజ్ఞతలు. మరోవైపు, సైబర్ నేరాల కట్టడి కేవలం పోలీసుల వల్లే కాదని గుర్తించి.. ప్రజల్లో చైతన్యం తెస్తూనే బ్యాంకులు, DoT వంటి విభాగాలను సమన్వయం చేస్తూ దేశవ్యాప్తంగా ‘ఆపరేషన్ ఆక్టోపస్’కు శ్రీకారం చుట్టాం. దీనిపై కేంద్ర ప్రభుత్వం, కేంద్ర హోం సెక్రటరీ గారు ప్రత్యేకంగా స్పందించి.. మన హైదరాబాద్ సిటీ పోలీస్ ఇచ్చిన సలహాలను స్వీకరించి ప్రశంసించడం మనందరికీ దక్కిన గౌరవం. అలాగే బాధితులకు సత్వర న్యాయం చేకూరేలా కేసుల దర్యాప్తు కోసం ‘ఇన్వెస్టిగేషన్ మానిటరింగ్ సెల్’ను ప్రారంభించి విజయవంతంగా ముందుకు తీసుకెళ్లాం. భావితరాల బిడ్డల్లో పోలీసుల పట్ల భయం పోయి, సమాజం పట్ల ఒక ఉన్నతమైన స్ఫూర్తి కలగాలని ముఖ్యంగా ప్రభుత్వ పాఠశాలల విద్యార్థులతో చేపట్టిన ‘డే విత్ సీపీ’ కార్యక్రమం నాకు ఎంతో ఆత్మసంతృప్తిని మిగిల్చింది. ఇక నగరవాసులు దశాబ్దాలుగా ఎదురుచూస్తున్న కేబీఆర్ పార్క్ చుట్టూ వన్‌వే జీహెచ్‌ఎంసీ కమిషనర్, ఇతర అధికారుల సహకారంతో విజయవంతంగా అమలు చేసి ట్రాఫిక్ సమస్యలకు ఉపశమనం కలిగించాం. మన ఇంట్లోని ఆడబిడ్డల రక్షణను బాధ్యతగా భావించి మహిళల భద్రత కోసం ‘స్పందన’ వాహనాలను అందుబాటులోకి తెచ్చాం. ఈ విజయాలన్నింటి వెనుక పోలీస్ కుటుంబం పడిన కష్టం దాగుంది. ఉత్తమ పనితీరు కనబరిచిన సిబ్బందిని గుర్తించే ‘ఎక్స్‌ట్రా మైల్’, వారి ఆరోగ్య రక్షణ కోసం ‘గ్రాండ్ హెల్త్ ఛాలెంజ్’ వంటి కార్యక్రమాలు వారి త్యాగాలకు మేమిచ్చిన చిరు కానుకలు. శాంతిభద్రతలు, ట్రాఫిక్, CAR, టాస్క్‌ఫోర్స్, CCRB, SB, సీపీ ఆఫీస్, అడ్మిన్ విభాగాలు సహా.. పండుగైనా, పబ్బమైనా తమ సొంత కుటుంబాలను పక్కనపెట్టి రోడ్లపై నిలబడి అహర్నిశలు శ్రమించిన హోంగార్డుల నుంచి అడిషనల్ సీపీల వరకు ప్రతి ఒక్కరికీ ధన్యవాదాలు. మాకు నిరంతరం మార్గదర్శనం చేసిన డీజీపీ గారికి, ఇతర ఉన్నతాధికారులకు, ప్రతి క్షణం వెన్నంటి నిలిచిన ప్రింట్-ఎలక్ట్రానిక్ మీడియా మిత్రులకు ప్రత్యేక కృతజ్ఞతలు. రాత్రింబవళ్లు చెమటోడ్చే నా పోలీస్ సిబ్బంది, వారి కుటుంబాలు ఎల్లప్పుడూ క్షేమంగా, ఆనందంగా ఉండాలని మనసారా కోరుకుంటున్నాను. హైదరాబాద్ ప్రజలందరూ సదా సురక్షితంగా, సంతోషంగా, భద్రంగా ఉండాలని ఆకాంక్షిస్తూ.. గుండెనిండా మధుర జ్ఞాపకాలతో.. హైదరాబాద్ సీపీగా ఇక సెలవు తీసుకుంటున్నాను. జై హింద్! #ThankYouHyderabad

— V.C. Sajjanar, IPS (@SajjanarVC_IPS) November 12, 2026