ఐపీఎల్ వేలంలో ముస్తాఫిజుర్ ఎంట్రీ!

ఐపీఎల్ మినీ వేలానికి సమయం దగ్గరపడుతున్న కొద్దీ క్రికెట్ వర్గాల్లో ఆసక్తి పెరుగుతోంది. డిసెంబర్ 16న గోవా వేదికగా జరగనున్న ఐపీఎల్ 2027 మినీ వేలం (IPL 2027 Mini Auction) కోసం ఫ్రాంచైజీలు తమ వ్యూహాలకు పదునుపెడుతున్నాయి. నవంబర్ 17లోపు రిటైన్ చేసుకునే ఆటగాళ్లు, విడుదల చేసే ప్లేయర్ల జాబితాలను సమర్పించాల్సి ఉంది. ఈసారి సుమారు 800 మంది ఆటగాళ్లు వేలంలో పాల్గొనే అవకాశం ఉండటంతో ఎవరికి భారీ ధర దక్కుతుందనే ఉత్కంఠ నెలకొంది.

ఈ మినీ వేలంలో అందరి దృష్టిని ఆకర్షిస్తున్న పేరు బంగ్లాదేశ్ స్టార్ పేసర్ ముస్తాఫిజుర్ రెహ్మాన్. రాబోయే ఐపీఎల్ సీజన్ కోసం నిర్వహించనున్న వేలంలో పాల్గొనేందుకు ఆయన పేరు నమోదు చేసుకున్నారు. ఈ విషయాన్ని బంగ్లాదేశ్ క్రికెట్ బోర్డు (BCB) క్రికెట్ ఆపరేషన్స్ ఛైర్మన్ షహరియార్ నఫీస్ ధ్రువీకరించారు. ముస్తాఫిజుర్‌తో పాటు మరో ఆరుగురు బంగ్లాదేశ్ క్రికెటర్లు కూడా వేలం కోసం పేర్లు నమోదు చేసుకున్నారు. ఈ జాబితాలో నౌహిద్ రాణా, రిషాద్ హొస్సేన్, హసన్ మహమూద్, తౌహీద్ హృదోయ్, తస్కీన్ అహ్మద్, షోరీఫుల్ ఇస్లాం ఉన్నారు. 

గత వేలంలో ముస్తాఫిజుర్ రెహ్మాన్‌ను కోల్‌కతా నైట్ రైడర్స్ (KKR) ఏకంగా రూ.9.20 కోట్ల భారీ ధరకు కొనుగోలు చేసింది. దీంతో ఐపీఎల్ చరిత్రలో అత్యధిక ధర పలికిన బంగ్లాదేశ్ ఆటగాడిగా రికార్డు సృష్టించాడు. అయితే బంగ్లాదేశ్‌లో నెలకొన్న రాజకీయ పరిణామాలు, వివాదాల నేపథ్యంలో భారత్‌లో అతడి భాగస్వామ్యంపై నిరసనలు వ్యక్తమయ్యాయి. ఈ పరిణామాల నేపథ్యంలో బీసీసీఐ సూచనల మేరకు కేకేఆర్ అతడిని జట్టు నుంచి విడుదల చేసింది. 

ముస్తాఫిజుర్ విడుదల వ్యవహారం తర్వాత భారత్, బంగ్లాదేశ్ క్రికెట్ బోర్డుల మధ్య ఉద్రిక్తతలు చోటుచేసుకున్నాయి. భద్రతా కారణాలను చూపుతూ టీ20 ప్రపంచకప్‌లో భారత్‌లో మ్యాచ్‌లు ఆడేందుకు బంగ్లాదేశ్ అభ్యంతరం వ్యక్తం చేసింది. తమ మ్యాచ్‌లను శ్రీలంకకు మార్చాలని అంతర్జాతీయ క్రికెట్ మండలిని (ICC) కోరింది. అయితే ఆ విజ్ఞప్తి తిరస్కరణకు గురికావడంతో బంగ్లాదేశ్ టోర్నీ నుంచి తప్పుకుంది. దీంతో ఆ జట్టు స్థానంలో స్కాట్లాండ్‌కు అవకాశం దక్కింది. 

ఇలాంటి పరిణామాల తర్వాత ఇప్పుడు మళ్లీ ఐపీఎల్ వేలంలోకి బంగ్లాదేశ్ ఆటగాళ్లు రావడం ఆసక్తికరంగా మారింది. ముఖ్యంగా డెత్ ఓవర్లలో వైవిధ్యమైన బౌలింగ్‌తో బ్యాటర్లను ఇబ్బంది పెట్టగల ముస్తాఫిజుర్ కోసం ఫ్రాంచైజీలు ఆసక్తి చూపిస్తాయా అన్నది చర్చనీయాంశంగా మారింది. గతంలో భారీ ధర పలికిన ఈ పేసర్‌కు ఈసారి ఎన్ని కోట్లు దక్కుతాయి? ఏ జట్టు అతడిని సొంతం చేసుకుంటుంది? అన్నది వేలం రోజునే తేలనుంది. అయితే పేర్లు నమోదు చేసుకోవడం మాత్రమే వేలంలో తుది అవకాశం లేదా జట్టు ఒప్పందానికి హామీ కాదు.