యోగి, అఖిలేశ్‌లకు కొత్త సవాల్

21-11-2026 | 06:21pm

యూపీ రాజకీయాల్లో ఒవైసీ ప్రకంపనలు

సహారన్‌పూర్: ఉత్తరప్రదేశ్ రాజకీయాల్లో(Uttar Pradesh Politics) కొత్త సమీకరణాలు తెరపైకి వస్తున్నాయి. ఏఐఎంఐఎం అధినేత అసదుద్దీన్ ఒవైసీ(AIMIM chief Asaduddin Owaisi), ఆజాద్ సమాజ్ పార్టీ అధ్యక్షుడు చంద్రశేఖర్ ఆజాద్‌తో కలిసి ఏర్పాటు చేసిన 'సామాజిక్ పరివర్తన్ మోర్చా' రాజకీయంగా కీలక ప్రత్యామ్నాయంగా మారుతుందని ధీమా వ్యక్తం చేశారు. ఈ కూటమి ముఖ్యమంత్రి యోగి ఆదిత్యనాథ్, సమాజ్‌వాదీ పార్టీ అధినేత అఖిలేశ్ యాదవ్‌లకు ఇబ్బందులు కలిగిస్తోందని వ్యాఖ్యానించారు.

సహారన్‌పూర్‌లో మీడియాతో మాట్లాడిన ఒవైసీ.. బీజేపీని ఓడించగలమని చెబుతున్న ప్రతిపక్ష కూటములపై ప్రశ్నలు సంధించారు. గత ఎన్నికల ఫలితాలను ప్రస్తావిస్తూ, సమాజ్‌వాదీ పార్టీ కూడా ఉత్తరప్రదేశ్‌తో పాటు 13 రాష్ట్రాల్లో సుమారు 640 స్థానాల్లో పోటీ చేసిందని గుర్తుచేశారు. ఇతర పార్టీలు ఎన్నికల్లో పోటీ చేసినప్పుడు తప్పులేదని, తమ పార్టీ పోటీ చేస్తే మాత్రం విమర్శించడం ఏమిటని ప్రశ్నించారు.

కొత్తగా ఏర్పడిన సామాజిక్ పరివర్తన్ మోర్చా ద్వారా యూపీ రాజకీయాల్లో మూడో ప్రత్యామ్నాయం అందుబాటులోకి వచ్చిందని ఒవైసీ పేర్కొన్నారు. ఇప్పటివరకు యోగి, అఖిలేశ్ మధ్యే అధికార పోరు సాగిందని, ఇప్పుడు కొత్త రాజకీయ శక్తి రంగంలోకి వచ్చిందని వ్యాఖ్యానించారు.

సిరాజ్‌కు ఒవైసీ మద్దతు

భారత టెస్ట్ జట్టులో మహ్మద్ సిరాజ్‌కు చోటు దక్కకపోవడంపై కాంగ్రెస్ ఎంపీ ఇమ్రాన్ మసూద్ వివక్ష ఆరోపణలు చేసిన నేపథ్యంలో ఒవైసీ స్పందించారు. హైదరాబాద్‌కు చెందిన ఆటో డ్రైవర్ కుమారుడైన సిరాజ్ ఎన్నో కష్టాలు ఎదుర్కొని భారత జట్టులో స్థానం సంపాదించాడని కొనియాడారు.

తన కృషి, పట్టుదలతో అంతర్జాతీయ క్రికెట్‌లో ప్రత్యేక గుర్తింపు తెచ్చుకున్నాడని అన్నారు. ఇంగ్లండ్‌తో ఐదు టెస్టుల సిరీస్‌లోనూ అన్ని మ్యాచ్‌లు ఆడి, 1,113 బంతులు వేసి అత్యధిక వికెట్లు తీసిన బౌలర్‌గా నిలిచాడని గుర్తుచేశారు. సిరాజ్‌లో పోరాట పటిమ, నిరాడంబరత తనకు ఎంతో నచ్చాయని, అతను తిరిగి భారత జట్టులోకి వచ్చి మరిన్ని విజయాలు అందిస్తాడని ఆశాభావం వ్యక్తం చేశారు.

అజం ఖాన్ వ్యాఖ్యలపైనా స్పందన

సమాజ్‌వాదీ పార్టీ సీనియర్ నేత అజం ఖాన్ చేసిన వ్యాఖ్యలపైనా ఒవైసీ స్పందించారు. వ్యక్తిగత విమర్శల కంటే ఉత్తరప్రదేశ్ ప్రజల సమస్యలే తనకు ముఖ్యమని స్పష్టం చేశారు. అజం ఖాన్‌కు బెయిల్ రావడం సంతోషకరమని, ఆయనకు మంచి ఆరోగ్యం కలగాలని ఆకాంక్షించారు. మొత్తంగా 2027 ఉత్తరప్రదేశ్ అసెంబ్లీ ఎన్నికలకు ముందే కొత్త కూటమి, రాజకీయ విమర్శలు, నేతల మధ్య మాటల యుద్ధంతో రాష్ట్ర రాజకీయాలు వేడెక్కుతున్నాయి.

మరిన్ని వార్తలు