అర్హులందరికీ రూ.5 లక్షల బీమా
మంచిర్యాల క్రైమ్, (విజయక్రాంతి): ఇందిరమ్మ కుటుంబ జీవిత బీమా పథకం (Indiramma Family Life Insurance Scheme) ద్వారా అర్హత కలిగిన ప్రతి కుటుంబానికి ప్రయోజనం చేకూరేలా చర్యలు తీసుకోవాలని జిల్లా కలెక్టర్ కుమార్ దీపక్ అధికారులను ఆదేశించారు. శనివారం నస్పూర్ మండల కేంద్రంతో పాటు క్యాతనపల్లి మున్సిపాలిటీ పరిధిలోని అమరవాదిలో మున్సిపల్ కమిషనర్ మురళీకృష్ణతో కలిసి పథకం దరఖాస్తుల స్వీకరణ ప్రక్రియను పరిశీలించారు.
ఈ సందర్భంగా కలెక్టర్ మాట్లాడుతూ జిల్లాలో పథకాన్ని పకడ్బందీగా అమలు చేయాలని సూచించారు. దరఖాస్తు ఫారాలను (Application Forms) ఎలాంటి తప్పులు లేకుండా పూర్తి చేయాలని ఆదేశించారు. 18 నుంచి 59 ఏళ్ల మధ్య వయసున్న కుటుంబ సభ్యుల్లో ఒకరిని బీమా వ్యక్తిగా ప్రతిపాదించాలని తెలిపారు. బీమా పొందే వ్యక్తి స్వయంగా దరఖాస్తుపై సంతకం చేసి, నామినీ వివరాలను పొందుపరిచి సమర్పించాలన్నారు.
స్వీకరించిన దరఖాస్తుల వివరాలను ఆన్లైన్ పోర్టల్ (Online Portal)లో స్పష్టంగా నమోదు చేయాలని సూచించారు. ఈ పథకం ద్వారా అర్హులైన కుటుంబాలకు రూ.5 లక్షల జీవిత బీమా (Life Insurance) వర్తిస్తుందని తెలిపారు. దరఖాస్తు చేసుకునేందుకు వచ్చే ప్రజలకు ఎలాంటి ఇబ్బందులు కలగకుండా అవసరమైన ఏర్పాట్లు చేయాలని ఆదేశించారు.
నామినీ ఎంపిక విషయంలో లబ్ధిదారుల నుంచి భౌతికంగా సంతకాలు తీసుకోవాలని, మొత్తం ప్రక్రియను పారదర్శకంగా నిర్వహిస్తూ పొరపాట్లకు తావులేకుండా చూడాలని అధికారులకు సూచించారు. ఈ కార్యక్రమంలో సంబంధిత అధికారులు పాల్గొన్నారు.