రాజ్యసభ ఎంపీ కన్నుమూత.. బీజేపీకి బిగ్ షాక్
బీజేపీ శిబిరంలో విషాదం.. ఎంపీ రాంరావ్ కన్నుమూత!
న్యూఢిల్లీ: భారతీయ జనతా పార్టీ (BJP)కి చెందిన రాజ్యసభ సభ్యుడు రాంరావ్ వడ్కుటే కన్నుమూశారు. గుండెపోటు (Heart Attack) కారణంగా ఆయన మరణించినట్లు సమాచారం. ఛాతిలో నొప్పి రావడంతో కుటుంబ సభ్యులు ఆయనను ఢిల్లీలోని AIIMS ఆసుపత్రికి తరలించారు. అక్కడ వైద్యులు చికిత్స అందిస్తున్న సమయంలోనే ఆయన తుదిశ్వాస విడిచారు. ఈ వార్తతో బీజేపీ శ్రేణుల్లో విషాదం నెలకొంది. రాంరావ్ వడ్కుటేకు సుమారు ఎనిమిది నెలల క్రితమే బీజేపీ రాజ్యసభ సభ్యుడిగా అవకాశం కల్పించింది. మహారాష్ట్ర రాజకీయాల్లో అనుభవజ్ఞుడైన నాయకుడిగా, ముఖ్యంగా ధంగర్ సమాజంలో కీలక నేతగా ఆయనకు గుర్తింపు ఉంది. గతంలో షెళీ-మేకల పెంపకందారుల సమాఖ్య (Sheli-Mendhi Mahasangh) అధ్యక్షుడిగా కూడా పనిచేశారు. మహారాష్ట్ర శాసనమండలి (Legislative Council) సభ్యుడిగా బాధ్యతలు నిర్వహించారు.
NCP నుంచి బీజేపీలోకి..
రాజకీయ ప్రస్థానంలో తొలుత నేషనలిస్ట్ కాంగ్రెస్ పార్టీ (NCP)లో కొనసాగిన వడ్కుటే.. 2019 అక్టోబర్లో ఆ పార్టీని వీడి బీజేపీలో చేరారు. 2021లో హింగోలి జిల్లా బీజేపీ అధ్యక్షుడిగా నియమితులయ్యారు. హింగోలి లోక్సభ నియోజకవర్గంలో Election In-charge, ఎన్నికల బాధ్యతలను కూడా నిర్వహించారు. వివాదరహిత నాయకుడిగా, ప్రజా జీవితంలో మంచి గుర్తింపు పొందిన వ్యక్తిగా ఆయనకు పేరుంది.
సంతాపం తెలిపిన రాజకీయ నేతలు..
రాంరావ్ వడ్కుటే మరణవార్తపై బీజేపీ మాజీ రాజ్యసభ సభ్యుడు డాక్టర్ వికాస్ మహాత్మే తీవ్ర దిగ్భ్రాంతి వ్యక్తం చేశారు. ధంగర్ సమాజానికి, ప్రజా జీవితానికి ఇది తీరని లోటని పేర్కొన్నారు. ఆయనతో తనకున్న స్నేహాన్ని గుర్తుచేసుకుంటూ Social Media వేదికగా భావోద్వేగ నివాళులర్పించారు. మరోవైపు ఎమ్మెల్సీ డాక్టర్ ప్రద్న్యా రాజీవ్ సాతవ్ కూడా ఆయన మృతిపై సంతాపం ప్రకటించారు. కుటుంబ సభ్యులకు ప్రగాఢ సానుభూతి తెలిపారు.