హైదరాబాద్: మల్లాపూర్‌లోని ఒక ప్రైవేట్ కంపెనీని మోసం చేసి రూ.2.1 కోట్ల నిధులను దుర్వినియోగం చేశారనే ఆరోపణలతో నాచారం పోలీసులు(Nacharam police) ఆ కంపెనీలో పనిచేస్తున్న ఇద్దరు వ్యక్తులను అరెస్టు చేశారు. నియాన్ మెటల్ క్రాఫ్ట్స్ ఆపరేషన్స్ మేనేజర్ ఎంఎన్ఎస్ భూషణ్ రెడ్డి, అకౌంటెంట్ డీ. శ్రీనివాస్ గా గుర్తించబడిన నిందితులు ఆ కంపెనీ నిబంధనలకు విరుద్ధంగా ఆదినాథ్ ఇండస్ట్రీస్ అనే మరో కంపెనీని స్థాపించారని ఆరోపించబడింది.

పోలీసులు తెలిపిన వివరాల ప్రకారం, వీరిద్దరూ తాము పనిచేస్తున్న కంపెనీ పేరుతో నకిలీ సేల్స్ ఇన్‌వాయిస్‌లు, వర్క్ ఆర్డర్‌లను తయారు చేసి, నియాన్ మెటల్ క్రాఫ్ట్స్ కంపెనీ బ్యాంక్ ఖాతా నుండి ఆదినాథ్ ఇండస్ట్రీస్ బ్యాంక్ ఖాతాకు ఆన్‌లైన్‌లో దాదాపు రూ.35 లక్షలను అక్రమంగా బదిలీ చేశారు. వర్క్ ఆర్డర్‌ల పేరుతో దాదాపు రూ.2.1 కోట్లను దుర్వినియోగం చేశారు. కంపెనీ యజమాని ఇచ్చిన ఫిర్యాదు ఆధారంగా కేసు నమోదు చేసి అనుమానితులను అరెస్టు చేసినట్లు నాచారం పోలీసులు తెలిపారు.