రైతు దారుణ హత్య

నాగర్‌కర్నూల్/ కల్వకుర్తి, నవంబర్ 8 (విజయక్రాంతి): రైతు హత్యకు గురైన ఘటన నాగర్‌కర్నూల్ జిల్లా వెల్దండ మండలం ఎంజీకాలనీ తండాలో చోటుచేసుకుంది. ఎంజీకాలనీ తండాకు చెందిన రాత్లావత్ రాజు(30), హిమబిందు ఆరునెలల క్రితం ప్రేమవివాహం చేసుకున్నారు. రాజుతో పాటు అతడి ఇద్దరు సోదరులు ఒకే దగ్గర ఉన్న వారి వ్యవసాయ పొలంలో వేరుశనగ సాగుచేశారు. వీరంతా అడవి పందుల బెడద నుంచి పంటను కాపాడుకోడం కోసం నిత్యం పంట పొలంలోనే కాపాలాగా ఉంటూ అక్కడే నిద్రిస్తున్నారు. గురువారం అర్ధరాత్రి బోరు మోటార్ ఆన్‌చేయడానికి వెళ్లిన రాజు హత్యకు గురయ్యాడు. సీఐ విష్ణువర్ధన్‌రెడ్డి ఘటనా స్థలాన్ని పరిశీలించారు. బండరాతితో తలపై మోది హత్యచేసినట్లు అనుమానిస్తున్నారు. హిమబిందు ఫిర్యాదు మేరకు కేసు దర్యాప్తు చేస్తున్నారు.