అడవిలో ఆధ్యాత్మిక అద్భుతం..రాసిగుట్టలో కనిపిస్తున్న వింత

1. భక్తి... ప్రకృతి రహస్యం..రాసిగుట్టలో అరుదైన అనుభూతి
2. భక్తి విశ్వాసానికి ప్రతీకగా మారిన రాసిగుట్ట ఆంజనేయ స్వామి
3. పసుపు పచ్చగా మారే భక్తులు..!

సిరిసిల్ల / వీర్నపల్లి (విజయక్రాంతి)

( హనుమాన్ జయంతి సందర్భంగా.... ప్రత్యేక కథనం)

రాజన్న సిరిసిల్ల జిల్లా, వీర్నపల్లి మండల అటవీ ప్రాంతంలో వెలసిన రాసిగుట్ట దాసాంజనేయ స్వామి ఆలయం ప్రస్తుతం భక్తులతో కిటకిటలాడుతోంది. గుట్టపై ఉన్న ఈ ఆలయానికి వెళ్లే కొద్దీ భక్తుల శరీరం పసుపు పచ్చ రంగులోకి మారడం ఇక్కడి ప్రధాన విశేషంగా నిలుస్తోంది. ఈ అరుదైన ఘటనను చూసేందుకు తెలంగాణతో పాటు ఇతర రాష్ట్రాల నుంచి కూడా భక్తులు పెద్ద సంఖ్యలో తరలివస్తున్నారు.

గుట్ట ఎక్కే కొద్దీ మారుతున్న రంగు

ఆలయానికి చేరుకోవాలంటే దట్టమైన అడవిలో సుమారు మూడు కిలోమీటర్ల మేర కాలినడకన గుట్ట ఎక్కాల్సి ఉంటుంది. ఈ మార్గంలో నడుస్తూ వెళ్లే భక్తుల కాళ్లు, చేతులు, దుస్తులు క్రమంగా పసుపు పచ్చ రంగులోకి మారిపోతాయి. కొందరిలో ముఖంపై కూడా ఆ రంగు కనిపిస్తుంది. ఆలయ దర్శనం ముగించుకుని తిరిగి వచ్చిన తరువాత కూడా కొంతసేపు అదే రంగు కనిపించడం భక్తులను ఆశ్చర్యానికి గురిచేస్తోంది.

భక్తుల నమ్మకం.. స్వామివారి మహిమే

ఈ ఘటనను భక్తులు పూర్తిగా ఆంజనేయ స్వామి మహిమగా భావిస్తున్నారు. స్వామివారి దర్శనానికి వెళ్లిన వారిపై ఆయన కరుణ చిహ్నంగా ఈ పసుపు రంగు కనిపిస్తుంది అని స్థానికులు చెబుతున్నారు. ప్రత్యేకంగా శనివారం, మంగళవారం రోజుల్లో వందలాది మంది భక్తులు గుట్ట ఎక్కి మొక్కులు తీర్చుకుంటారు.

కొంతమంది భక్తులు గుట్టపైకి వెళ్లే ముందు కనిపించని పసుపు రంగు, కొద్దిదూరం నడిచిన తర్వాత శరీరంపై స్పష్టంగా కనిపిస్తోందని చెబుతున్నారు. దీంతో ఈ ఆలయంపై భక్తుల్లో మరింత ఆసక్తి పెరుగుతోంది.

శాస్త్రవేత్తల వివరణ

ఇక ఈ ఘటనపై భూగర్భ శాస్త్రవేత్తలు భిన్న అభిప్రాయం వ్యక్తం చేస్తున్నారు. గుట్ట ప్రాంతంలో ఉండే ప్రత్యేక లెటరైట్ రాళ్లు, పసుపు రంగు ఖనిజ ధూళి కారణంగానే శరీరంపై ఆ రంగు పడుతుందని చెబుతున్నారు. అడవి మార్గంలో ఉన్న మట్టి, రాళ్లలోని ఖనిజాల ప్రభావం వల్ల చెమటతో కలిసినప్పుడు చర్మం పసుపు పచ్చగా కనిపిస్తోందని విశ్లేషిస్తున్నారు.

అయితే శాస్త్రీయ కారణాలు ఏవైనా ఉన్నా, భక్తులు మాత్రం దీనిని స్వామివారి అనుగ్రహంగానే భావిస్తున్నారు.

ప్రకృతి అందాలు ఆధ్యాత్మిక ప్రశాంతత

రాసిగుట్ట చుట్టూ దట్టమైన అడవి, ఎత్తున కొండలు, సహజ వాతావరణం భక్తులను ఆకట్టుకుంటాయి. గుట్ట ఎక్కే ప్రయాణమే ఒక ఆధ్యాత్మిక అనుభూతిని కలిగిస్తుందని భక్తులు చెబుతున్నారు. నగర జీవన ఒత్తిడికి దూరంగా ప్రశాంత వాతావరణంలో స్వామివారి దర్శనం కలగడం ఈ క్షేత్ర ప్రత్యేకతగా మారింది.

అభివృద్ధి అవసరం

ప్రస్తుతం ఆలయానికి వెళ్లే మార్గంలో పూర్తి స్థాయి రహదారి, తాగునీరు, విశ్రాంతి షెడ్లు వంటి సౌకర్యాలు పరిమితంగానే ఉన్నాయి. భక్తుల సంఖ్య రోజురోజుకూ పెరుగుతున్న నేపథ్యంలో ప్రభుత్వం, దేవాదాయ శాఖ ప్రత్యేక చర్యలు తీసుకుని ఈ ప్రాంతాన్ని పర్యాటకఆధ్యాత్మిక కేంద్రంగా అభివృద్ధి చేయాలనే డిమాండ్ వినిపిస్తోంది.

భక్తులను ఆకర్షిస్తున్న అరుదైన క్షేత్రం

ప్రకృతి రహస్యం, భక్తి విశ్వాసం కలిసిన రాసిగుట్ట దాసాంజనేయ స్వామి ఆలయం ప్రస్తుతం తెలంగాణలో ప్రత్యేక గుర్తింపు పొందుతోంది. పసుపు పచ్చగా మారే భక్తుల గుట్టగా పేరొందిన ఈ క్షేత్రం భక్తులను, పర్యాటకులను సమానంగా ఆకర్షిస్తోంది.