-గుట్టుచప్పుడు కాకుండా లింగ నిర్ధారణ

-ఆర్‌ఎంపీలే కీలక సూత్రధారులు

-ఒక్కో అబార్షన్కు రూ.50వేలకు పైనే..

-మైనర్ బాలికలైతే రూ.లక్ష వరకు వసూలు

-ప్రైవేటు క్లినిక్‌లో నిత్యం ఇదే తంతు

నల్లగొండ, నవంబర్ 30 (విజయక్రాంతి) : చిట్యాల మండలానికి చెందిన ఓ అమ్మాయి ఓ ప్రైవేటు కాలేజీలో ఇంటర్మీడియట్ చదువుతోంది. పక్క మండలమైన నార్కట్పల్లి మండలానికి చెందిన ఓ అబ్బాయి ఆ అమ్మాయికి మాయమాటలు చెప్పి గర్భవతిని చేశాడు. ఈ విషయం కాస్త తల్లిదండ్రులకు తెలిసింది.

దీంతో ఆ అబ్బాయి తరపున తన సమీప బంధువు ఎంటర్ అయ్యి వివాదాన్ని సెటిల్ చేశాడు. అందులో భాగంగానే ఆ అమ్మాయికి చిట్యాలలోని ఓ ప్రైవేటు ఆస్పత్రిలో ఆబార్షన్ చేయించారు. ఈ మొత్తం వ్యవహారాన్ని నార్కట్పల్లి మండలంలోని బ్రాహ్మణవెల్లెంల గ్రామానికి చెందిన ఓ ఆర్‌ఎంపీ కీలక సూత్రధారిగా వ్యవహారించారు. ఇదీ ఈ ఒక్క సంఘటనతో ఆగిపోవడం లేదు. ఇలాంటి వెలుగులోకి రాని ఘటనలు కోకొల్లలు.

నల్లగొండ జిల్లాలో ప్రైవేటు ఆస్పత్రులు, క్లీనిక్లు, స్కానింగ్ సెంటర్లు, బ్లెడ్ బ్యాంక్ దందా జోరుగా సాగుతోంది. కనీస అర్హతలు లేకున్నా.. నిబంధనలేమీ పాటించకపోయినా.. పైరవీలు, పైసలిస్తే చాలు క్లీనిక్లు, స్కానింగ్ సెంటర్ల ఏర్పాటుకు అనుమతులు చిటికెలో ఇస్తున్నారనే ఆరోపణలు జిల్లా యంత్రాంగంపై లేకపోలేదు.

ఆర్‌ఎంపీలు, వైద్య సహాయక సిబ్బంది సైతం సొంతంగా క్లీనిక్లు నిర్వహిస్తున్నారంటే పరిస్థితి అర్థం చేసుకోవచ్చు. ఇటీవల చిట్యాలకు చెందిన అండాలు అనే రిటైర్డ్ మల్టీపర్పస్ హెల్త్ సూపర్వైజర్ గతంలో ఏఎన్‌ఎంగా పని చేసింది. అయితే ఈ అనుభవంతో చిట్యాల పట్టణంలో ఏకంగా సాయితేజ పేరుతో ఓ ఆస్పత్రిని ఏర్పాటు చేసింది.

ఈ ఆస్పత్రిలో ఆర్‌ఎంపీలు, స్కానింగ్ సెంటర్ల దళారుల ద్వారా ఆబార్షన్లు చేస్తోంది. మూడో సంతానం ఆడబిడ్డలు, మైనర్ బాలికలు, అక్రమ సంబంధాలకు సంబంధించిన గర్భాలను ఆబార్షన్ చేసేందుకు పెద్ద మొత్తంలో డిమాండ్ చేస్తూ గత కొంతకాలంగా దందా నడిపిస్తోంది. ఈ వ్యవహారాన్ని కాస్త చిట్యాల పోలీసులు ఇటీవల బట్టబయలు చేయడం కొసమెరుపు. ఇంత జరుగుతున్నా.. వైద్యారోగ్య శాఖ మాత్రం చోద్యం చూస్తోందనే చెప్పాలి. అదేవిధంగా చిట్యాల మైనర్ బాలిక ఆబార్షన్ విషయంలో కీలకంగా వ్యవహారించిన ఆర్‌ఎంపీపై ఏలాంటి చర్యలు తీసుకోకపోవడం గమనార్హం.

ఆర్‌ఎంపీలే కీలక సూత్రదారులు..

ఆబార్షన్ల దందా చేయడంలో ఆర్‌ఎంపీలే కీలక సూత్రధారులుగా వ్యవహరిస్తుండడం గమనార్హం. లింగ నిర్ధారణ పరీక్షలు చేయడంతో పాటు ఆడబిడ్డ అని తేలితే.. ఆ వెంటనే ఆబార్షన్ సైతం చేస్తుండడం గమనార్హం. లింగ నిర్ధారణ చేసుకునే వారిలో ఎక్కువగా మగ బిడ్డ కావాలనుకునేవారు ఉంటున్నారు. మొదట ఆడపిల్ల పుట్టాక, మగ సంతానం కోసం లింగనిర్ధారణ పరీక్షలు చేయించుకునేందుకు ఆర్‌ఎంపీలను ఆశ్రయిస్తున్నారు.

ఆర్‌ఎంపీలు, స్కానింగ్ సెంటర్లు, డాక్టర్లు, మెడికల్ షాప్స్ ద్వారా ఈ దందా జోరుగా నడుస్తోంది. ఇందులో స్కానింగ్ సెంటర్లు టెస్టులు చేసి ఆడ, మగ వివరాలు చెప్పడం ఒకటైతే.. డాక్టర్లు దొంగచాటున క్లీనిక్లో అబార్షన్లు చేయడం మరో అంశం. ఇవేమీ లేకుండా కొంతమంది ఆర్‌ఎంపీలే స్వయంగా ఇంటికి వచ్చి టాబ్లెట్ పద్ధతిలో అబార్షనన్ చేస్తున్నారు. ఒక్కో అబార్షనన్ కోసం రూ.20వేల నుంచి రూ.50 వేల వరకు వసూలు చేస్తున్నారు.

స్కానింగ్ సెంటర్లలో కోడ్ లాంగ్వేజ్..

కొన్ని స్కానింగ్ సెంటర్లలో పుట్టబోయే బిడ్డ మగ, ఆడ అని చెప్పే సమయంలో పట్టుపడకుండా కోడ్ లాంగ్వేజ్తో మేనేజ్ చేస్తున్నారు. గర్భిణులు మొదటగా ఆర్‌ఎంపీల వద్దకు రాగానే ఒంటరిగా స్కానింగ్ సెంటర్లకు తీసుకెళ్తారు. అక్కడ లోపలికి వెళ్లే ముందు మొబైల్ తీసుకురానివ్వరు. స్కానింగ్ చేశాక ఆడ పిల్ల అయితే పాప మంచిగా ఉందంటూ, బాబు అయితే అబ్బాయి చాలా ముద్దుగా ఉన్నాడంటూ కోడ్ లాంగ్వేజ్లో చెప్తారు.

ఈ దందా ఉమ్మడి నల్లగొండ జిల్లావ్యాప్తంగా మూడు పువ్వులు ఆరు కాయలుగా కొనసాగుతోంది. గతంలో ఈ దందా ప్రధాన పట్టణాలకే పరిమితమై ఉండేది. కానీ ప్రస్తుతం చిన్న చిన్న మండల కేంద్రాల్లోనూ యథేచ్చగా సాగుతోంది. ఇతర ప్రాంతాల నుంచి టెక్నీషియన్లు, పోర్టబుల్ అల్ట్రాసౌండ్ మిషన్న్ తీసుకొచ్చి ప్రైవేట్ ఆస్పత్రుల్లో స్కానింగ్ చేస్తున్నారు.