నవ్వులు పంచే గాయపడ్డ సింహం

తరుణ్ భాస్కర్ కథానాయకుడిగా మరో యూనిక్ మూవీ రాబోతోంది. ఈ సినిమాను డైరెక్టర్ కశ్యప్ శ్రీనివాస్ తెరకెక్కిస్తున్నారు. సప్తస్వ మీడియా వర్క్స్, పీవోవీ స్టోరీస్, జీ స్టూడియోస్ బ్యానర్లపై ఈ చిత్రాన్ని కళ్యాణ చక్రవర్తి మంథిన, భానుకిరణ్ ప్రతాప, విజయ్ కృష్ణ లింగమనేని, ఉమేశ్ బన్సాల్ నిర్మిస్తున్నారు. దర్శకుడు పవన్ సాదినేని సమర్పకుడిగా వ్యవహరిస్తున్న ఈ సినిమా టైటిల్‌ను మేకర్స్ శుక్రవారం రివిల్ చేశారు. ‘గాయపడ్డ సింహం’ అనే పేరుతో వస్తున్న ఈ సినిమాకు ‘నవ్వకండి! ఇది చాలా సీరియస్ మేటర్!’ అనేది ట్యాగ్‌లైన్.

టైటిల్ పోస్టర్‌ను చూస్తుంటే ఇదొక పొలిటికల్ సెటైర్, క్రైమ్, హాస్యం కలగలిసిన ఎంటర్‌టైనర్ అని తెలుస్తోంది. ఫిబ్రవరి 9న ఈ మూవీ టీజర్‌ను విడుదల కానుందని మేకర్స్ ప్రకటించారు. ఈ చిత్రంలో ఫరియా అబ్దుల్లా, మానస చౌదరి కథానాయికలు కాగా.. విష్ణు ఓయి, హర్షవర్ధన్, శుభలేఖ సుధాకర్ కీలక పాత్రల్లో నటిస్తున్నారు. ఈ మూవీ షూటింగ్ దాదాపు పూర్తయింది. ఒక పాట చిత్రీకరణ మిగిలి ఉంది. సూర్యప్రకాశ్ జ్యోసుల కథను అందించిన ఈ చిత్రానికి విద్యాసాగర్ చింత సినిమాటోగ్రఫీని, స్వీకర్ అగస్తి సంగీతాన్ని అందిస్తుండగా, విప్లవ్ నైషధం ఎడిటర్‌గా, చంద్రిక గొర్రెపాటి ప్రొడక్షన్ డిజైనర్‌గా పనిచేస్తున్నారు.