బెంగళూరులో దారుణం.. బైకర్‌ను వెంబడించి చంపిన జంట

బెంగళూరు: రోడ్డు ప్రమాదంలో బైక్‌ను కారుతో ఢీకొట్టి, అందులో ప్రయాణిస్తున్న ఒకరిని చంపిన కేసులో బెంగళూరు పోలీసులు దంపతులను అరెస్టు చేశారు. ఈ కేసు బెంగళూరులోని పుట్టెనహళ్లి పోలీస్ స్టేషన్ పరిధిలో నమోదైంది. మృతుడిని 24 ఏళ్ల దర్శన్ ఎన్ గా గుర్తించారు. అతని స్నేహితుడు, 24 ఏళ్ల వరుణ్ తీవ్రంగా గాయపడి ప్రస్తుతం ఆసుపత్రిలో చికిత్స పొందుతున్నాడు. నిందితులను కలరిపయట్టు మార్షల్ ఆర్ట్స్ బోధకుడు మనోజ్ కుమార్, అతని భార్య ఆర్తి శర్మగా గుర్తించారు. "అక్టోబర్ 25న పుట్టెనహళ్లి సమీపంలోని శ్రీరామ లేఅవుట్‌లో ఇద్దరు యువకులతో ప్రయాణిస్తున్న బైక్‌ను కారు ఢీకొట్టింది.  ఈ సంఘటన అక్టోబర్ 25న రాత్రి 11.30 గంటలకు జరిగింది. మొదట జె.పి. నగర్ ట్రాఫిక్ పోలీసులు ప్రమాదవశాత్తు మరణం కేసు నమోదు చేశారు" అని డీసీపీ (సౌత్) లోకేష్ జగలసర్ తెలిపారు. అయితే, కారు డ్రైవర్ ఉద్దేశపూర్వకంగా బైక్‌ను వెనుక నుండి ఢీకొట్టాడని సీసీటీవీ ఫుటేజ్ తర్వాత వెల్లడైంది. తదుపరి దర్యాప్తులో ఇద్దరు బైకర్లు అక్కడి నుండి వెళ్లిపోయే ముందు కారు అద్దం పగలగొట్టారని తేలిందని డీసీపీ తెలిపారు. దీనితో ఆగ్రహించిన కారు డ్రైవర్, యూ-టర్న్ తీసుకుని, బైక్‌ను వెంబడించి, ఉద్దేశపూర్వకంగా దాన్ని ఢీకొట్టి, అక్కడి నుండి పారిపోయాడని తెలుస్తోంది.

దర్యాప్తు తర్వాత పుట్టెనహళ్లి పోలీస్ స్టేషన్‌లో హత్య కేసు నమోదైంది. నేరం చేసిన తర్వాత, కారు డ్రైవర్ ముసుగు ధరించి సంఘటనా స్థలానికి తిరిగి వచ్చి సాక్ష్యాలను దాచడానికి విరిగిన కారు భాగాలను సేకరించాడని ఆరోపించారు. నిందితులైన భార్యాభర్తలిద్దరూ ముఖాలకు కప్పి, కారు భాగాలను సంఘటన స్థలం నుండి బయటకు తీస్తున్నట్లు సీసీటీవీలో కనిపించింది. హత్య కేసులో ఆధారాలను నాశనం చేసిన అభియోగాలను కూడా పోలీసులు జోడించారని డీసీపీ తెలిపారు. ఆ జంటను అరెస్టు చేసి కోర్టు ముందు హాజరుపరిచారు. మృతుడు గిగ్ వర్కర్ కాగా, నిందితుడిఫిజికల్ ఆర్ట్స్ టీచర్‌గా పనిచేస్తున్నాడని పోలీసులు తెలిపారు. భారతీయ న్యాయ సంహిత (BNS) సెక్షన్లు 103(1), 109, 238, 324(5), మరియు 3(5) కింద కేసు నమోదు చేయబడింది. ఈ సంఘటనకు సంబంధించిన సీసీటీవీ ఫుటేజ్ సోషల్ మీడియాలో వైరల్ అయ్యాయి. నిందితుడు డ్రైవర్ మనోజ్ బైక్‌ను దాదాపు 2 కిలోమీటర్ల దూరం వెంబడించి ఈ దారుణానికి పాల్పడ్డారని పోలీసు వర్గాలు తెలిపాయి. ఈ ప్రమాదంలో బైక్‌పై ఉన్న ఇద్దరు రైడర్లు గాల్లోకి దూసుకెళ్లి కింద పడిపోయారు. బైక్ రైడర్లు ఉద్దేశపూర్వకంగా తమ కారు ముందుకి వచ్చి అద్దం పగలగొట్టి వేగంగా వెళ్లిపోయారని, ఇదే తమకు కోపం తెప్పించిందని నిందితులు పోలీసులకు తెలిపారు.