న్యూఢిల్లీ: సెంట్రల్ బోర్డ్ ఆఫ్ సెకండరీ ఎడ్యుకేషన్(CBSE) కీలక నిర్ణయం తీసుకుంది. 202-26 సంవత్సరం నుంచి రెండుసార్లు సీబీఎస్ఈ పదోతరగతి పరీక్షలు నిర్వహించనున్నట్లు ప్రకటించింది. ఈ సందర్భంగా సీబీఎస్‌ఈ ఎగ్జామినేషన్ కంట్రోల్ సంయమ్ భరద్వాజ్ మాట్లాడుతూ.. 2026 నుంచి మొదటి దశ ఫిబ్రవరిలో, రెండవ దశ మేలో ఉంటాయి. మొదటి పరీక్ష తప్పనిసరి, రెండవది ఐచ్ఛికం. ఫిబ్రవరిలో జరిగే మొదటి పరీక్షకు ప్రతి విద్యార్థి హాజరు కావాలని, అయితే తమ స్కోర్‌లను మెరుగుపరచుకోవాలనుకునేవారు లేదా మూడు సబ్జెక్టులలో తక్కువ మార్కులు పొందినవారు మేలో జరిగే రెండవ పరీక్షకు హాజరు కావచ్చన్నారు.

విద్యార్థులు సైన్స్, మేథమెటిక్స్, సోషల్ సైన్స్, లాంగ్వేజ్‌లలో మూడు సబ్జెక్టులను ఎంచుకుని బెటర్‌మెంట్ కోసం రాసుకోవచ్చని వెల్లడించారు. ఇంటర్నల్ అసెస్‌మెంట్ మాత్రం అకడమిక్ సెషన్‌లో ఒకేసారి ఉంటుందని తెలిపారు. ఈ నిర్ణయం జాతీయ విద్యా విధానం (NEP) 2020 సిఫార్సులను అనుసరిస్తుంది. ఇది సౌకర్యవంతమైన, విద్యార్థి-స్నేహపూర్వక మూల్యాంకనాలకు పిలుపునిచ్చింది. విద్యార్థుల పరీక్ష ఒత్తిడిని తగ్గించడం, ఒక సంవత్సరం మొత్తం వేచి ఉండకుండా వారి పనితీరును మెరుగుపరచుకునే అవకాశాన్ని అందించడం లక్ష్యంగా పెట్టుకుంది.