హోజాయ్‌: అస్సాంలోని(Assam) హోజాయ్‌లో శనివారం ఉదయం ఏనుగుల గుంపు(Elephants) సైరంగ్-న్యూఢిల్లీ రాజధాని ఎక్స్‌ప్రెస్‌ను(Sairang-New Delhi Rajdhani Express) ఢీకొన్న ఘటనలో ఎనిమిది ఏనుగులు మరణించగా, ఒక ఏనుగు పిల్ల గాయపడింది. ఈ ఘటన కారణంగా రైలు సర్వీసులకు అంతరాయం ఏర్పడింది. రాజధాని ఎక్స్‌ప్రెస్ రైలు ఏనుగుల గుంపును ఢీకొనడంతో, ఇంజిన్‌తో పాటు ఐదు బోగీలు పట్టాలు తప్పాయి. ఈ ఘటనలో ప్రయాణికులకు ఎలాంటి ప్రాణనష్టం లేదా గాయాలు జరగలేదని అధికారులు తెలిపారు. న్యూఢిల్లీ వెళ్తున్న ఆ రైలుకు తెల్లవారుజామున 2.17 గంటల ప్రాంతంలో ప్రమాదం జరిగిందని వెల్లడించారు.

సైరాంగ్-న్యూఢిల్లీ రాజధాని ఎక్స్‌ప్రెస్ రైలు మిజోరంలోని సైరాంగ్ (ఐజ్వాల్ సమీపంలో)ను ఆనంద్ విహార్ టెర్మినల్ (ఢిల్లీ)తో కలుపుతుంది. గౌహతి రైల్వే స్టేషన్‌లో రైల్వే అధికారులు హెల్ప్‌లైన్ నంబర్లను జారీ చేశారు. 0361-2731621 / 2731622 / 2731623.  గత నెలలో పశ్చిమ బెంగాల్‌లోని జల్పాయ్‌గురి జిల్లాలోని ధూప్‌గురిలో రైలు ఢీకొని ఒక ఏనుగు మరణించింది. ఈ ఘటన నవంబర్ 30న జరిగింది. ఆ పెద్ద ఏనుగు అక్కడికక్కడే మరణించింది. పట్టాల పక్కన గాయాలతో పడి ఉన్న ఒక ఏనుగు పిల్ల కనుగొనబడింది. గత ఐదేళ్లలో దేశవ్యాప్తంగా రైలు ఢీకొన్న ఘటనల్లో కనీసం 79 ఏనుగులు మరణించాయని పర్యావరణ మంత్రిత్వ శాఖ ఆగస్టులో పార్లమెంటుకు తెలియజేసింది.