హైదరాబాద్: మెసేజింగ్ సేవల రంగంలోకి అడుగుపెడుతున్న ఎలన్ మస్క్(Elon Musk), ఎక్స్ చాట్(X Chat) అనే కొత్త ప్లాట్ ఫామ్ ను ప్రారంభించారు. ఈ కొత్త సర్వీస్ మెటా యాజమాన్యంలోని వాట్సాప్ మాదిరిగానే ఎండ్-టు-ఎండ్ ఎన్ క్రిప్షన్, ఫైల్-షేరింగ్ సామర్థ్యాల వంటి లక్షణాలను అందిస్తుందని చెబుతున్నారు. ప్రస్తుతం బీటా పరీక్ష దశలో ఉన్న ఎక్స్ చాట్(XChat), మార్క్ జుకర్ బర్గ్ వాట్సాప్ కు పోటీగా నిలవవచ్చు.

తన X ఖాతాలోని ఒక పోస్ట్ లో మస్క్ ఈ మెసేజింగ్ ప్లాట్ ఫామ్ ఆడియో, వీడియో కాలింగ్ కు కూడా మద్దతు ఇస్తుందని పేర్కొన్నాడు. ఎక్స్ చాట్ కొత్త రస్ట్-ఆధారిత ఆర్కిటెక్చర్ పై నిర్మించబడిందన్నారు. అదనపు భద్రత కోసం బిట్ కాయిన్ లాంటి ఎన్ క్రిప్షన్ ను కలిగి ఉందని మస్క్ వెల్లడించారు. కంపెనీ అధికారిక లాంచ్ తేదీని ప్రకటించనప్పటికీ, బీటా పరీక్ష ముగిసిన తర్వాత ఎక్స్ చాట్ బహిరంగంగా అందుబాటులోకి వస్తుందని భావిస్తున్నారు.