ఆయిల్ ఫాం సాగుకు రైతులు ముందుకు రావాలి: కలెక్టర్ హరిత

ఆసిఫాబాద్,(విజయక్రాంతి): జిల్లాలో ఆయిల్ ఫాం సాగుకు అనుకూల పరిస్థితులు ఉన్నందున అర్హులైన రైతులు ముందుకు రావాలని జిల్లా కలెక్టర్ కె. హరిత పిలుపునిచ్చారు. మంగళవారం నిర్వహించిన రైతు వారం సమావేశంలో ఆమె మాట్లాడుతూ.. సాగు నీరు ఉన్న రైతులు ఈ పంటను చేపట్టాలని సూచించారు. ప్రభుత్వం సబ్సిడీ అందిస్తోందని, మొదటి నాలుగేళ్లు అంతర్ పంటలు వేసుకోవచ్చని తెలిపారు.

ఈ సమావేశంలో అదనపు కలెక్టర్ (రెవెన్యూ) ఎం. డెవిడ్, జిల్లా గ్రంథాలయ చైర్మన్ కాండే అనిల్, వ్యవసాయ మార్కెట్ కమిటీ చైర్మన్ లు ఇరుకుల్ల మంగ, కుడ్మేత విశ్వనాథ్, జిల్లా ఉద్యానవన శాఖ అధికారి నదీం, జిల్లా వ్యవసాయ శాఖ అధికారి వెంకటి పాల్గొన్నారు. సంప్రదాయ పంటలకు ప్రత్యామ్నాయంగా ఆయిల్ ఫాం, కూరగాయల సాగు ద్వారా అధిక లాభాలు పొందవచ్చని కలెక్టర్ తెలిపారు. ఈ సందర్భంగా ప్రత్యామ్నాయ పంటలు సాగు చేస్తున్న రైతులను సన్మానించారు. ఈ కార్యక్రమంలో రైతులు, సంబంధిత శాఖల అధికారులు పాల్గొన్నారు.