స్టార్ హీరో రామ్‌చరణ్ హైలీ యాంటిసిపేటెడ్ రూరల్ యాక్షన్ డ్రామా ‘పెద్ది’ చిత్రీకరణ శరవేగంగా కొనసాగుతోంది. బుచ్చిబాబు సానా దర్శకత్వం వహిస్తున్న ఈ సినిమాలో బాలీవుడ్ బ్యూటీ జాన్వీకపూర్ హీరోయిన్‌గా నటిస్తోంది. వృద్ధి సినిమాస్ బ్యానర్‌పై వెంకట సతీశ్ కిలారు నిర్మిస్తున్న ఈ భారీ ప్రాజెక్ట్‌ను మైత్రీ మూవీ మేకర్స్, సుకుమార్ రైటింగ్స్ సమర్పిస్తున్నాయి. ఇందులో శివరాజ్‌కుమార్, జగపతిబాబు, దివ్యేందుశర్మ, బోమన్ ఇరానీ ముఖ్యపాత్రలు పోషిస్తున్నారు. ఈ చిత్రం నుంచి ఇప్పటికే ఫస్ట్‌లుక్ పోస్టర్లు, గ్లింప్స్, వర్కింగ్ స్టిల్స్ స్ట్రాంగ్ బజ్‌ను క్రియేట్ చేశాయి. తాజాగా మేకర్స్ కథానాయకి జాన్వీకపూర్ ఫస్ట్ లుక్‌ను విడుదల చేశారు.

ఆమెను ‘అచ్చియ్యమ్మ’గా పరిచయం చేస్తూ విడుదల చేసిన రెండు డిఫరెంట్ పోస్టర్లు ఇప్పుడు సోషల్‌మీడియాలో వైరల్‌గా మారాయి. ఒక పోస్టర్‌లో రస్టిక్ ప్రింటెడ్ చీర, సంప్రదాయ నగలు, సన్‌గ్లాసెస్‌తో స్టులిష్‌గా మైక్ ముందు ధైర్యంగా నిలబడి ఉన్న జాన్వీ లుక్ చూసి ప్రేక్షకులు ఫిదా అవుతున్నారు. ఈ పోస్టర్ పండుగ వాతావరణాన్ని క్రియేట్ చేసింది. రెండో పోస్టర్‌లో నీలిరంగు చీరలో జీప్‌పై నిలబడి, ధైర్యంగా అభివాదం చేస్తూ కనిపించింది జాన్వీ. ఇది ఆమె పాత్రలోని సోషల్ ఇంపాక్ట్, ఆత్మవిశ్వాసాన్ని చక్కగా ప్రజెంట్ చేసింది. ఫియర్స్ అండ్ ఫియర్‌లెస్ అనే టైటిల్‌కి తగినట్లు ఈ పోస్టర్లలో జాన్వీ పూర్తిగా మాసీ లుక్‌తో ఆకట్టుకుంటోంది. ఈ సినిమా 2026, మార్చి 27న విడుదల కానుంది. ఈ చిత్రానికి ఏఆర్ రెహమాన్ సంగీతం సమకూరుస్తుండగా, ఆర్ రత్నవేలు డీవోపీగా, నవీన్ నూలి ఎడిటర్‌గా పనిచేస్తున్నారు.