1. పదవులకు వన్నె తెచ్చిన నేతలు
2. అగ్రస్థానంలో కరీంనగర్ జిల్లా 
   

కరీంనగర్, నవంబరు 29 (విజయక్రాంతి): కరీంనగర్ ఉమ్మడి జిల్లా లో చాలా మంది నేతలు సర్పంచ్ స్థానం నుంచి చట్ట సభలకు ఎదిగారు. ఎమ్మెల్యేలు, మంత్రులదాకా ఎదిగిన నేతలు ఉమ్మడి కరీనంగర్ జిల్లాలో ఉన్నారు. 

దుద్దిళ్ల శ్రీపాదరావు 

ఇందులో దుద్దిళ్ల శ్రీపాదరావు అత్యున్నత స్పీకర్ పదవిని అలంకరించి ఆ పదవికే వన్నె తెచ్చారు. నాయకత్వ లక్షణాలు పుణికి పుచ్చుకున్న శ్రీపాదరావు రాజకీయాల్లోకి అడుగిడాలని స్నేహితులు, హితులు ప్రోత్సహించారు. ఆ దిశగా అడుగులు వేస్తూ పోటీ చేసి మొదటిసారి సర్పంచ్‌గా ధన్వాడ నుంచి ఎన్నుకోబడ్డారు. వరుసగా మరో మారు ఆయనకే ప్రజలు మద్దతు పలకడంతో రెండవసారి ఎన్నికయ్యారు.

మహాదేవపూర్ సమితి అధ్యక్షుడిగా ఎన్నికైన తరువాత ఎల్ ఎం బి చైర్మన్ పదవికి మంథని నుంచి గెలిచారు. ఆయన రాజకీయ ఎదుగుదలకు ఎల్‌ఎంబి బ్యాంకు చైర్మన్ ఎన్నిక ఎంతో సహకరించింది. దీంతో పూర్తిగా నియోజకవర్గానికే ఆయన సుపరిచితమయ్యాడు. పదవి వస్తే ముఖం చాటేసుకునే నాయకులకు భిన్నంగా అయన ప్రజల మధ్యనే ఉంటూ, వారి కష్ట, నష్టాలలో పాలు పంచుకొని ప్రజానాయకునిగా ఎదిగారు.

1983 ఎన్నికల్లో ఆయనకు కాంగ్రెస్ పార్టీ నుంచి ఎమ్మెల్యేగా పోటీ చేసే అవకాశం లభించింది. అప్పుడే పురుడు పోసుకున్న తెలుగు దేశం పార్టీ ప్రభావం, ఎన్టీఆర్ ప్రభంజనం ముందు కూడా శ్రీపాదరావు విజయం సాధించారు. ఆ తర్వాత జరిగిన ఎన్నికల్లో మూడు సార్లు ఎమ్మెల్యేగా ఎన్నికై.. శాసనసభ స్పీకర్‌గా అన్ని పార్టీల మద్దతుతో పదవిని అధిష్టించారు. ఆ పదివికి వన్నె తెచ్చారని ఎంతోమంది ప్రముఖులు, రాజకీయా విశ్లేషకులతో ప్రశంశలు పొందారు. 

వొడితెల రాజేశ్వర్‌రావు 

కరీంనగర్ జిల్లా హుజూరాబాద్ మండలం సింగాపూర్‌కు చెందిన దివంగత వొడితెల రాజేశ్వర్‌రావు సర్పంచ్‌గా రాజకీయ జీవితాన్ని ప్రారంభించారు. 1972లో జరిగిన ఎన్నికల్లో హుజూరాబాద్ నుంచి ఎమ్మెల్యేగా గెలుపొందారు. ఆ తర్వాత ఎమ్మెల్సీగా, రాజ్యసభ సభ్యుడిగా పనిచేశారు. 

సర్పంచ్ నుంచి ఎమ్మెల్యేలుగా తండ్రీకొడుకులు

మాజీ రాజ్యసభ సభ్యుడు కెప్టెన్ వొడితెల లక్ష్మీకాంతరావు 1983 నుంచి 1995 వరకు సింగాపూర్ గ్రామ సర్పంచ్‌గా ఏకగ్రీవంగా ఎన్నికయ్యారు. 2004లో హుజూరాబాద్ ఎమ్మెల్యేగా గెలుపొంది మంత్రిగా పనిచేశారు. ఆయన కుమారుడు వొడితెల సతీష్ కుమార్ కూడా సింగాపూర్ సర్పంచ్‌గా పనిచేసి 2014, 2018లో హుస్నాబాద్ నుంచి ఎమ్మెల్యేగా గెలుపొందారు. 

మరికొందరు నేతలు

జగిత్యాల జిల్లా అంతర్గాంకు చెందిన సుద్దాల దేవయ్య 1981లో సర్పంచ్‌గా ఎన్నికయ్యారు. 1982లో తెలుగుదేశం పార్టీలో చేరి కరీంనగర్ జిల్లా పరిషత్ చైర్మన్‌గా పనిచేశారు. 1994, 1999 ఎన్నికల్లో నేరెళ్ల ఎమ్మెల్యేగా గెలిచి రాష్ట్ర మంత్రిగా పనిచేశారు. ఇదే జిల్లా మెట్‌పల్లి మండలం వెంకట్రావుపేటకు చెందిన కొమిరెడ్డి రాములు సర్పంచ్‌గా పనిచేసి ఆ తర్వాత ఎమ్మెల్యే అయ్యారు.

కరీంనగర్ జిల్లా గుండి గ్రామానికి చెందిన వెలిచాల రాజేందర్‌రావు తొలుత సర్పంచ్‌గా పనిచేసి అనంతరం ఎమ్మెల్యే, ఎమ్మెల్సీగా గెలిచారు. జగిత్యాల జిల్లా ధర్మపురం మండలం తిమ్మాపూర్ గ్రామానికి చెందిన జువ్వాడి రత్నాకర్‌రావు సర్పంచ్‌గా పదేళ్లపాటు పనిచేసి 1981లో సమితి అధ్యక్షుడిగా, 1989, 1999లో ఎమ్మెల్యేగా గెలుపొంది మంత్రిగా పనిచేశారు. పెద్దపల్లి మాజీ ఎమ్మెల్యే గీట్ల ముకుందరెడ్డి కూనారం గ్రామం నుంచి 1970, 1976లో సర్పంచ్‌గా గెలుపొంది అనంతరం 1981లో పెద్దపల్లి ఎమ్మెల్యేగా పోటీ చేశారు. 1985లో ఎమ్మెల్యేగా గెలుపొందారు.

తెలంగాణ సాయుధ పోరాట యోధుడు దేశిని చిన్న మల్లయ్య కరీంనగర్ జిల్లా చిగురుమామిడి మండలం బొమ్మనపల్లి సర్పంచ్‌గా పనిచేసి ఆ తర్వాత 1984, 1989, 1994 వరుసగా మూడుసార్లు సీపీఐ నుంచి ఎమ్మెల్యేగా గెలుపొందారు. సిరిసిల్ల జిల్లాకు చెందిన సీనియర్ నాయకుడు, మాజీ ఎమ్మెల్యే కటకం మృత్యుంజయం తొలుత గంభీరావుపేట వార్డు సభ్యుడిగా గెలుపొంది రాజకీయ జీవితాన్ని ప్రారంభించారు.

అనంతరం ఎమ్మెల్యేగా గెలుపొందారు. మాజీ విప్ ఆరెపల్లి మోహన్ 1988లో తొలిసారిగా సర్పంచ్ ఎన్నికై 2001 వరకు పనిచేశారు. 2006లో కరీంనగర్ జిల్లా పరిషత్ చైర్మన్‌గా పనిచేశారు. 2009లో మానకొండూర్ ఎమ్మెల్యేగా గెలుపొంది ప్రభుత్వ విప్‌గా పనిచేశారు. పెద్దపల్లి మాజీ ఎమ్మెల్యే బిరుదు రాజమల్లు గ్రామ పంచాయతీలో కారోబార్‌గా పనిచేసి తెలుగుదేశం పార్టీ నుంచి ఎమ్మెల్యేగా గెలుపొందారు.