1. పాత, కొత్త వర్గాల మధ్య పంచాయితీ  
   

నకిరేకల్‌లో బయటపడ్డ విభేదాలు

నకిరేకల్, నవంబర్ 29 (విజయక్రాంతి): నల్లగొండ జిల్లా నకిరేకల్ నియోజకవర్గంలో కాంగ్రెస్ పాత, కొత్త వర్గాల మధ్య నెలలుగా మండుతున్న అంతర్గత కలహాలు గ్రామపంచాయతీ ఎన్నికల టికెట్ల కేటాయింపులతో బయటపడ్డాయి.

బీఆర్‌ఎస్ హయాంలో ప్రభుత్వ ఇబ్బందులను ఎదుర్కొని పార్టీని నిలబెట్టిన సీనియర్ నేతలను పక్కనబెట్టి, ఎమ్మెల్యే వేముల వీరేశం తన అనుచరులకు మాత్రమే ప్రాధాన్యం ఇస్తున్నారంటూ సీనియర్ నేతలు ఆరోపణలు చేస్తున్నారు. అయితే అందరినీ కలుపుకొని పోతున్నానని, పాత, కొత్త అనే తేడా లేదని ఎమ్మెల్యే చెప్పినా, టికెట్ కేటాయింపుల్లో వర్గ రాజకీయాలు స్పష్టంగా కనిపిస్తున్నాయని సీనియర్ నేతలు వాదిస్తున్నారు. 

తుది నిర్ణయం ఎమ్మెల్యే వీరేశందే!

గ్రామపంచాయతీ ఎన్నికల టికెట్ల కోసం రెండు వర్గాల మధ్య పోటీ తీవ్రతరం కావడంతో, తుది నిర్ణయ అధికారం ఎమ్మెల్యే వీరేశంకే ఉండటంతో ఆయనతో సన్నిహితంగా ఉన్నవారే ఎక్కువగా దక్కించుకుంటున్నారనే ఆరోపణలు మిన్నంటాయి. 40 ఏళ్లుగా పార్టీకి నమ్మకంగా పనిచేసిన నాయకులను కనీసం పట్టించుకోకుండా తన అనుచరులకు ఇష్టానుసారంగా టికెట్లు కేటాయిస్తున్నారని కట్టంగూర్ మాజీ జడ్పీటీసీ సుంకరబోయిన నర్సింహ మండిపడ్డారు.

కట్టంగూర్ మండలంలో పాత కాంగ్రెస్ నాయకులను పూర్తిగా పక్కనబెట్టి మొత్తం టికెట్లు ఒకే వర్గానికిచ్చి, ఇన్‌చార్జిగా కూడా ఎమ్మెల్యే వర్గానివారినే పెట్టడంతో మండల రాజకీయం ఒక్కసారిగా రచ్చకెక్కింది. ఈ పరిణామాలపై బహిరంగ సమావేశాలు నిర్వహించిన సీనియర్ వర్గం, స్థానిక ఎన్నికల్లో తామూ సమానంగా పోటీలో ఉంటామని స్పష్టం చేస్తూ, జరుగుతున్న అన్యాయాన్ని మంత్రి కోమటిరెడ్డి వెంకటరెడ్డి దృష్టికి తీసుకువెళ్తామని ప్రకటించింది. 

వీరేశం నియంతృత్వం?

ఎమ్మెల్యే వీరేశం నియోజకవర్గంలో నియంతృత్వంగా వ్యవహరిస్తూ, గ్రామమండల నాయకుల అభిప్రాయాలను పరిగణించకుండా 22 గ్రామాలకు తన సొంత అభ్యర్థులను ప్రకటించడం పార్టీ పట్ల అవమానమని నేతలు ఆరోపించారు. అద్దె నాయకులను నమ్మవద్దని, నిజమైన కాంగ్రెస్ శ్రేణులు నామినేషన్లు వేయాలని పాత కాంగ్రెస్ వర్గం పిలుపునివ్వడంతో అంతర్గత యుద్ధం మరింత ముదిరింది. పంచాయతీ ఎన్నికల ముందు కాంగ్రెస్లో ఈ పాకానపడ్డ విభేదాలు ఏ దిశకు దారి తీస్తాయోనని కార్యకర్తలు ఆందోళన చెందుతున్నారు.