తెలుగులో ప్రభుత్వ ఉత్తర్వులు సంతోషకరం

మాజీ ఉప రాష్ట్రపతి వెంకయ్యనాయుడు

హైదరాబాద్, జూలై 16 (విజయక్రాంతి): ప్రభుత్వ ఉత్తర్వులు తొలిసారి తెలుగులో జారీ చేయడం చాలా సంతోషకరమైన విషయమని మాజీ ఉప రాష్ట్రపతి వెంకయ్యనాయుడు పేర్కొన్నారు. తెలుగు రాష్ట్రాల్లో ప్రభుత్వ ఉత్తర్వులు సహా పరిపాలనకు సంబంధించిన అంశాలు తెలుగులో జారీ చేయాలని తాను ఎప్పటినుంచో సూచిస్తూనే ఉన్నానని తెలిపారు. తెలంగాణ ప్రభుత్వం తొలిసారి రైతుల రుణమాఫీ మార్గదర్శకాలపై తెలుగులో ఉత్తర్వులు జారీ చేయడం అభినందనీయమని చెప్పారు.

ప్రజల కోసమే పరిపాలన అయినప్పుడు వారికి సులువుగా అర్థమయ్యే భాషలోనే ప్రభుత్వ ఉత్తర్వులు, పరిపాలనకు సంబంధించి ఇతర సమాచారం ఉండాలని తాను ఎప్పటినుంచో చెప్తున్నాని గుర్తుచేశారు. ప్రజల సౌలభ్యానికి ప్రాధాన్యమిస్తూ తెలుగులో ఉత్తర్వులు జారీ చేసినందుకు తెలంగాణ ప్రభుత్వానికి, సీఎం రేవంత్‌రెడ్డికి, వ్యవసాయ శాఖ కార్యదర్శి రఘునందన్‌రావుకు, అధికారులు, సిబ్బందికి వెంకయ్య అభినందనలు తెలిపారు. తెలుగు రాష్ట్రాల ప్రభుత్వాలు ఇకపై అన్ని ఉత్తర్వులను, సమాచారాన్ని పూర్తిగా తెలుగులోనే అందించాలని ఆకాంక్షించారు.