సంతృప్తిపరచాల్సిన అవసరం నాకు లేదు

స్టార్ హీరోయిన్‌గా టాలీవుడ్, బాలీవుడ్ ప్రేక్షకులకు సుపరిచితురాలిగా మారటమే కాదు వివాదాలతోనూ తరచూ వార్తల్లో నిలుస్తోంది తాప్సీ పన్ను. ఇటీవల ఫొటోగ్రాఫర్లు గట్టిగా పేరు పెట్టి పిలుస్తూ తన కారును వెంబడించినందుకు ఈ చిన్నది చిరాకు పడుతున్న వీడియోలు సోషల్ మీడియాలో వైరల్ అయ్యాయి. అభిమానంతో అనన్య ద్వివేది అనే ఓ యువతి సెల్ఫీ అడిగిన సందర్భంలో తాప్సీ ఆమెతో ప్రవర్తించిన తీరుపై కూడా నెటిజన్లు విమర్శలు గుప్పించారు. ఇదిలా ఉండగా, తన రాబోయే చిత్రం ‘ఫిర్ ఆయీ హసీన్ దిల్‌రుబా’ ప్రమోషన్లలో జోరుగా పాల్గొంటోంది తాప్సీ.

ఈ నేపథ్యంలోనే ఓ ఇంటర్వ్యూలో పాల్గొన్న తాప్సీ కెమెరా మెన్ల తీరుపట్ల అసంతృప్తి వ్యక్తం చేసింది. ‘వారి (ఫొటో, వీడియోగ్రాఫర్లు) అభ్యర్థనను నెరవేర్చటం నేను బాధ్యతగా భావించను. నన్ను ఫొటోలు, వీడియోలు తీసుకోవటంతోనే ఆగకుండా క్లిక్‌బైట్ వన్ అంటూ నన్ను ఇబ్బందులకు గురిచేస్తున్నారు. ఇలాంటివే నాకు సినిమా అవకాశాలు తీసుకొస్తున్నాయని నేను నమ్మటం లేదు. కాబట్టి మీడియా అని పిలువబడే ఒక వర్గాన్ని నేను సంతృప్తిపరచాల్సిన అవసరం లేదు” అంటూ తడబడకుండా చెప్పేసింది తాప్సీ.