1. డిసెంబర్ 8, 9న పార్లమెంటును ముట్టడిస్తాం
2. జనవరిలో రాష్ర్ట వ్యాప్తంగా బీసీల రథయాత్ర 
3. ఫిబ్రవరిలో లక్షలాదిమందితో హైదరాబాద్‌ను దిగ్బంధిస్తాం
4. బీసీ జేఏసీ చైర్మన్ జాజుల శ్రీనివాస్‌గౌడ్ వెల్లడి
5. ఇందిరా పార్క్ వద్ద ‘బీసీ రాజకీయ యుద్ధ బేరి’
6. హాజరైన మధుసూదనచారి, మాజీ మంత్రి శ్రీనివాస్‌గౌడ్

ముషీరాబాద్, నవంబర్ 30 (విజయక్రాంతి): బీసీలకు 42 శాతం రిజర్వేషన్లు కల్పించిన తర్వాతనే స్థానిక ఎన్నికలకు వెళ్తామని నమ్మించి మోసగించిన చరిత్ర కాంగ్రెస్ ప్రభుత్వానికే దక్కుతుందని, అసెంబ్లీలో మద్దతిచ్చి కేంద్రంలో బీసీ బిల్లుకు మద్దతు ఇవ్వకుండా బీసీలను నయవంచన చేసిన చరిత్ర బీజేపీకే దక్కుతుందని బీసీ జేఏసీ చైర్మన్ జాజుల శ్రీనివాస్‌గౌడ్ ఫైర్ అ య్యారు. స్థానిక ఎన్నికల్లో తమ సర్పంచ్ స్థానాలను గుంజుకుంటే తాము సీఎం సీటు ను గుంజుకుంటున్నామని హెచ్చరించారు.

ఆదివారం తెలంగాణ బీసీ జేఏసీ ఇచ్చిన చలో హైదరాబాద్ పిలుపు మేరకు బీసీల రాజకీయ యుద్ధ బేరి మహాసభ హైదరాబాదులోని ఇందిరా పార్క్ వద్ద జరిగింది. ఈ మహాసభకు రాష్ర్టవ్యాప్తంగా వేలాది మంది తరలివచ్చారు. ఈ సందర్భంగా జాజుల శ్రీనివాస్‌గౌడ్ మాట్లాడుతూ.. జనాభాలో 60 శాతానికిపైగా ఉన్న బీసీలకు రాజ్యాధికారం తగ్గకుండా కుట్ర చేస్తున్నారని, బీసీలు సర్పంచులు కాకుండా ఓసీలు కోర్టులను వేది కలుగా చేసుకుని బీసీల నోటికాడు ముద్దను లాగేసుకున్నారని మండిపడ్డారు.

సర్పంచ్ సీటు ఇవ్వని అగ్రకులాల సీఎం సీటును గుంజుకుందామన్నారు. కాంగ్రెస్ పార్టీకి చిత్తశుద్ధి ఉంటే సీఎం నేతృత్వంలో  అఖిల పక్షంతో ఢిల్లీకి వెళ్లాలని, రాహుల్ గాంధీ ద్వారా శీతాకాల పార్లమెంటు సమావేశం చర్చించాలని ఆయన డిమాండ్ చేశారు. 42 శాతం రిజర్వేషన్లు తగ్గించి బీసీలకు అన్యా యం చేసిన కాంగ్రెస్ పార్టీ వైఖరి వైఖరి పై రాహుల్ గాంధీ ఇప్పటివరకు స్పందించకపోవడం చాలా బాధాకరమన్నారు.

రాష్ర్ట అసెంబ్లీలో బిల్లు పెట్టినప్పుడు, చట్టం చేసినప్పుడు, మద్దతు ఇచ్చిన బీజేపీ ఢిల్లీలో చట్టం ఆమోదించే బాధ్యత ఉన్నప్పటికీ నేటి వరకు చట్టం ఆమోదించకుండా బీసీలకు ద్రోహం తలపెడుతుందని ఆయన ఆరోపించారు. డిసెంబర్ 8, 9 ఢిల్లీలో పార్లమెంటు వేదికగా పోరాటాని ప్రారంభిస్తామని, జనవరిలో రాష్ర్టవ్యాప్తంగా బీసీల రథయాత్ర నిర్వహించి, ఫిబ్రవరిలో లక్షల మందితో హైద రాబాద్ ను దిగ్బంధిస్తామని ఆయన హెచ్చరించారు.

మాజీ స్పీకర్, ఎమ్మెల్సీ సిరికొండ మధుసూదనాచారి, మాజీమంత్రి వి శ్రీనివాస్‌గౌడ్ మాట్లాడుతూ.. బీసీలకు అన్యాయం చేయడంలో కాంగ్రెస్ పార్టీకి ఈ దేశంలో ఎవరు సాటి లేరన్నారు. కాంగ్రెస్, బీజేపీలకు బీసీలపై చిత్తశుద్ధి ఉంటే శీతాకాల పార్లమెంట్ సమావేశాలలో బీసీ రిజర్వేషన్ల పెం పు కోసం రాజ్యాంగాన్ని సవరించాలని సూ చించారు. కాగా ఈ మహాసభకు ఫోన్ ద్వారా పార్లమెంటు సభ్యులు ఈటల రాజేందర్ సందేశం అందించారు.

బీసీ జేఏసీ చేస్తున్న పోరాటానికి తన వంతుగా పూర్తి మద్దతు ఉంటుందని, బీసీలకు గ్రామపంచాయతీ ఎన్నికల్లో జరిగిన మోసాన్ని బీసీలు గ్రహించి, ప్రస్తుతం జరిగే సర్పం ఎన్నికలలో జనరల్ స్థానాలను కూడా బీసీలు బరిలో ఉండి గెలిపించుకొని బీసీల రాజకీయ ఐక్యతను చాటాలని ఈటెల రాజేందర్ కోరారు. 

ఈ కార్యక్రమంలో బీసీ జేఏసీ వర్కింగ్ చైర్మన్ గుజ్జ కృష్ణ, బీసీ కుల సంఘాల జేఏసీ చైర్మన్ కుందారం గణేష్ చారి, సాహిత్య అకాడమీ మాజీ చైర్మన్ జూలూరి గౌరీ శంకర్, తెలంగాణ క్రాంతి అధ్యక్షుడు పృద్వి రాజ్ యాదవ్, మాల మహానాడు జాతీయ అధ్యక్షుడు చెన్నయ్య, బీసీ విద్యార్థి సంఘం జాతీయ అధ్యక్షులు తాటికొండ విక్రమ్ గౌడ్, బీసీ యువజన సంఘం జాతీయ అధ్యక్షులు కనకాల శ్యాం కురుమ, వివిధ సంఘాల నేతలు పాల్గొన్నారు.