సెప్టెంబర్‌లో ‘జామ్ జంక్షన్’

‘జామ్ జంక్షన్’ పేరుతో సెప్టెంబర్ 6న ఓ మ్యూజికల్ ఈవెంట్‌ను నిర్వహించనున్నారు. ఈ కార్యక్రమానికి హైటెక్స్ గ్రౌండ్స్ వేదిక కానుంది. ఈ ఈవెంట్ విశేషాలను నిర్వాహకులు మీడియాకు వెల్లడించారు. ఈ సంద ర్భంగా ఫిల్మ్ డైరెక్టర్ మారుతి మాట్లాడుతూ.. “జామ్ జంక్షన్’ మ్యూజిక్ కాన్సెప్ట్ నాకు చాలా నచ్చింది. ఇలాంటి కార్యక్రమం ఎక్కడా జరగలేదు. చాలా మంది ప్రతిభావంతులను ఒక ఫ్లాట్ ఫాం మీద చూడబోతున్నాం” అని తెలిపారు. ‘జామ్ జంక్షన్’లో ఆకట్టుకున్న వారికి నగదు బహుమతితోపాటు తమ సినిమాలో మ్యూజిక్ చేసే ఛాన్స్ ఇస్తాం’ అని ప్రకటించారు.

సంగీత దర్శకుడు తమన్ మాట్లాడుతూ.. “నేను బ్యాండ్ నుంచే వచ్చాను. బ్యాండ్ ఎమోషన్ నాకు తెలుసు. ఇప్పటికీ రెగ్యులర్‌గా బ్యాండ్ మ్యూజిక్‌కి వెళ్తాను. హైదరాబాద్ ఇప్పుడు మ్యూజికల్ సిటీ. చాలా మంచి బ్యాండ్స్, మ్యుజిషియన్స్ వస్తున్నారు. వారితో కలిసి పని చేస్తున్నాను. ‘జామ్ జంక్షన్’లో భాగమవుతుండటం ఆనందంగా ఉంది” అని చెప్పారు. ‘మంచి ప్రయత్నం చేస్తున్న టీమ్ అందరికీ ఆల్ ది బెస్ట్‌” అని నిర్మాత ఎస్‌కేఎన్ అన్నారు. శ్రీ ఈవెంట్స్ కంపెనీ ఫౌండర్, సీఈవో శ్రీ ‘జామ్ జంక్షన్ కాన్సెప్ట్’ విశేషాలను వివరించారు.