లారీ-బస్సు ఢీ.. ముగ్గురు స్పాట్ డెడ్

హైదరాబాద్: మహబూబ్‌నగర్‌ జిల్లా జడ్చర్ల పట్టణంలోని 44వ జాతీయ రహదారిపై జరిగిన ఘోర రోడ్డు ప్రమాదంలో ముగ్గురు మృతి చెందగా, మరో 15 మందికి తీవ్ర గాయాలయ్యాయి. జడ్చర్ల మండలం(Jadcherla Mandal) భూరెడ్డిపల్లి సమీపంలో శుక్రవారం అర్థరాత్రి హైదరాబాద్‌ నుంచి అరుణాచలం(Hyderabad to Arunachalam) వెళ్తున్న జేబీటీ ట్రావెల్స్‌ బస్సు, లారీని ఢీకొన్నాయి. అతివేగంగా వచ్చిన బస్సు మొదట కారును ఢీకొట్టడంతో లారీని ఢీకొనడానికి ముందు స్వల్పంగా నష్టం వాటిల్లిందని ప్రత్యక్ష సాక్షులు చెబుతున్నారు. ఈ ప్రమాదంలో బస్సు ముందు భాగం నుజ్జునుజ్జు అయింది. ఘటనా స్థలంలోనే బస్సు క్లీనర్‌తో పాటు ఇద్దరు ప్రయాణికులు ప్రాణాలు కోల్పోయారు. అత్యవసర సేవలు వెంటనే స్పందించాయి. గాయపడిన ప్రయాణికులను చికిత్స నిమిత్తం జడ్చర్ల, మహబూబ్ నగర్(Mahabubnagar Govt Hospital) ప్రభుత్వాసుపత్రులకు తరలించారు. ప్రమాదం జరిగిన సమయంలో బస్సులో దాదాపు 35 మంది ప్రయాణికులు ఉన్నారు. ఈ ఘోర రోడ్డు ప్రమాదంపై కేసు నమోదు చేసుకున్న పోలీసులు మృతదేహాలను స్వాధీనం చేసుకుని పోస్టుమార్టం నిమిత్తం మార్చురీకి తరలించారు. అనంతరం దర్యాప్తు జరుపుతున్నట్లు పోలీసులు తెలిపారు.