ఫిట్‌నెస్ కోసం ప్రతిరోజు ఎక్సర్‌సైజ్ లో భాగంగా రన్నింగ్, జాగింగ్ వంటివి చేస్తుంటారు చాలామంది. వాళ్లలో కొందరు అప్పుడప్పుడు రన్నింగ్ రేస్, మారథాన్ పోటీల్లో కూడా పాల్గొంటుంటారు. అయితే రోమ్‌కు చెందిన ఓ వృద్ధుడు కొన్నేండ్లుగా మారథాన్‌కు ప్రాతినిథ్యం వహిస్తున్నాడు. ఈ ఏడాదితో మారథాన్‌లో ఆయన పాల్గొని ముఫ్పుయి ఏండ్లు పూర్తయ్యాయి. 

ఆ కథేంటో చూద్దామా.. రోమ్‌కి చెందిన ఆంటోనియో రావ్ వయసు ప్రస్తుతం 92 ఏళ్లు. 1933లో పుట్టిన ఆయన సొంతూరు కాలాబ్రియా. పదేండ్ల వయసులో పరుగెత్తడం ప్రారంభించాడు ఆంటోనియో. మొదటిసారి తన సొంతూరు కాలాబ్రియా నుంచి రోమ్ వరకు రన్నింగ్ చేశాడు. అప్పుడు మొదలుపెట్టిన పరుగు ఇప్పటివరకు ఆపలేదు. టీనేజీలో తన ఫ్రెండ్స్‌ను కలవడం కోసం రోజూ పరుగెత్తేవాడట.. కానీ అది ఎవరూ ఊహించలేని విధంగా తన జీవితంలో భాగమైపోయింది. 

అంతేకాదు.. 30 ఏళ్లలో ఎప్పుడూ రోమ్ మారథాన్ పోటీల్లో ఒక్కటి కూడా మిస్ కాలేదు. ఈ ఏడాది రోమ్ మారథాన్ 6 గంటల, 44 నిమిషాల, 16 సెకండ్లలో పూర్తి చేశాడు. ఇంకా ఇంట్రెస్టింగ్ విషయమేంటంటే.. గతేడాది కంటే ఈసారి పది నిమిషాల ముందే గోల్ రీచ్ అయ్యాడు. అంటే తన వయసు ముందుకెళ్లే కొద్దీ ఇంకా ఎనర్జిటిక్‌గా తయారవుతున్నట్టే. అయితే దీనికంటే గొప్ప విషయం మరొకటి ఉంది. 

అదేంటంటే.. 2023లో అంటే 90 ఏళ్లు నిండిన తర్వాత మారథాన్‌లో పాల్గొని కొత్త ప్రపంచ రికార్డు సాధించాడు. ఆ పోటీలో 6 గంటల 14 నిమిషాలకు పూర్తి చేసి ఎమ్ 90 వరల్డ్ రికార్డ్ బ్రేక్ చేశాడు. తన మారథాన్ జర్నీ గురించి మాట్లాడుతూ.. ’రన్నింగ్, వాకింగ్ అనేది జీవితంలో ఒక భాగం. ప్రతి ఒక్కరూ ఇవి చేయాలి. ఈ వయసులో నేను మారథాన్ పూర్తి చేయగలుగుతున్నానంటే.. ఇతరులు కూడా దీన్ని చేయగలరు. దానికి నేనే ఉదాహరణ అంటు న్నాడు ఆంటోనియో.