1. ఆకుపచ్చ బంగారం (వెదురు) సాగుకు ప్రణాళికలు
2. టేకు కలపకు ప్రత్యామ్నాయం
3. 60 ఎకరాల్లో 8వేల మొక్కల ప్లాంటేషన్ లక్ష్యం 
4. 50 శాతం రాయితీపై రైతులకు అందజేత

కేరళ రాష్ట్రంలో విజయవంతమైన ‘మిషన్ బాంబూ’ను ప్రోత్సహించేందుకు ప్రభుత్వం ప్రణాళికలు రూపొందిస్తోంది. అందులో భాగంగానే జిల్లాలో రైతులు ఆకుపచ్చ బంగారం(వెదురు) సాగు చేపట్టేలా రాయితీలు కల్పిస్తోంది. తద్వారా చిన్న, సన్న కారు రైతుల జీవితాల్లో వెలుగులు నింపేందుకు ప్రయత్నిస్తోంది. రైతుల ఆర్థికాభివృద్ధికి దోహదపడే పంటగా గుర్తింపు పొందిన వెదురు సాగు శాతాన్ని రాష్ట్రంలో పెంచేందుకు ప్రభుత్వం దృష్టి సారించింది.

ఇందులో భాగంగానే 50 శాతం రాయితీ మీద వెదురు మొక్కలను అందజేస్తూ రైతులను ప్రోత్సహిస్తుంది. జిల్లాలో ఈ ఏడాది హార్టికల్చర్ డిపార్టుమెంటు యాక్షన్ ప్లాన్ తయారు చేయడమే కాకుండా ఉద్యానవన శాఖ ఆధ్వర్యంలో క్షేత్ర స్థాయిలో రైతులకు అవగాహన కల్పిస్తోంది. 

వెదురు సాగు రెండు రకాలు 

వెదురు సాగు రెండు (బ్లాక్ ప్లాంటేషన్, బౌండరీ ప్లాంటేషన్) రకాలుగా చేస్తుంటారు. బ్లాక్ ప్లాంటేషన్ పద్ధ్దతిలో రైతులు వెదురు మొక్కలను తమ పొలాల్లో 5 x 5 మీటర్ల దూరంలో ఎకరానికి 160 మొక్కలు నాటే అవకాశముండగా బౌండరీ ప్లాంటేషన్ పద్ధతిలో వెదురు మొక్కలను పొలం చుట్టూ గట్టుపై రెండు మీటర్ల దూరంలో ఎకరానికి 160 మొక్కలు నాటుకోవచ్చు. వేర్లు కందకం పై భాగం కింద ఉండేలా నాటి మట్టి, కుళ్లిన ఎరువు లేదా కంపోస్టుతో కందకాన్ని నింపి రైజోమ్‌లు దెబ్బతినకుండా జాగ్రత్త పడాల్సి ఉంటుంది.

టేకుకు ప్రత్యామ్నాయంగా...

జిల్లాలో టేకు కర్రకు చాలా డిమాండ్ ఉంది. నూతన గృహాలకు, ఫర్నిచర్ తదితరాలకు ఎక్కువగా ఉపయోగిస్తున్నారు. గృహ ఉపకరణలకు కలకు బదులు ప్రత్యామ్నాయంగా వెదురును ఉపయోగించేందుకు జిల్లాలో వెదురు సాగుకు ప్రభుత్వం ప్రోత్సహిస్తోంది. ఇందు కోసం హార్టికల్చర్ శాఖ, అటవీ శాఖల సమన్వయంతో జిల్లాలో వెదురు సాగుకు పూనుకుంది. ప్రస్తుతం అటవీ ప్రాంతాల్లో, సింగరేణి భూముల్లో పెరుగుతున్న వెదురును ఇక నుంచి రైతుల పంట చేలల్లో, తోటలకు సరిహద్దుల్లో సాగు చేసే విధంగా హార్టికల్చర్ అధికారులు ప్రణాళికలు రూపొందించారు.

60 ఎకరాల్లో ...

మంచిర్యాల జిల్లాలో బౌండరీ ప్లాంటేషన్ ను ఎంచుకొని 60 ఎకరాల్లో సాగు చేయడమే లక్ష్యంగా అధికారులు సాగుతున్నారు. 8 వేల ( జనరల్ కు 6038, ఎస్సీలకు 1236, ఎస్టీలకు 726) మొక్కలను రైతులకు అందజేయడం లక్ష్యం కాగా ఇప్పటి వరకు దరఖాస్తు చేసుకున్న ఆరుగురు రైతులకు 2844 (2524 మొక్కలను ఐదుగురికి (జనరల్), 320 మొక్కలు ఒక (ఎస్టీ) రైతుకు అందజేశారు.

ఈ మొక్కలన్నీ కూడా ములుగు సీఓఈ (కాలేజ్ ఆఫ్ ఎక్సలెన్సీ) నుంచి రైతులకు అందజేస్తున్నారు. ఒక్కో మొక్క ధర రూ. 300 ఉండగా సబ్సిడీ రూ. 150 (50 శాతం) ప్రభుత్వం అందజేస్తుంది. ఈ సబ్సిడీ మొదటి ఏడాది ఒక మొక్కకు రూ. 90, రెండో ఏడాది రూ. 60 అందజేయనుంది.

వెదురుతో లాభాలు అధికం

వెదురు చెట్లు 50 ఏండ్ల వరకు సజీవంగా ఉంటాయి. ఖర్చు తక్కువ. చీడపీడల సమస్యలుండవు, కేవలం అగ్గి నుంచి మాత్రమే వీటిని రక్షించుకోవా ల్సి ఉంటుంది. దేశంలోనే కాకుండా విదేశాల్లో సైతం వెదురుకు ఎక్కువగా డిమాండ్ ఉండటంతో ఎగుమతి చేసే అవకాశాలున్నాయి. జిల్లాలోని నాలుగు వ్యవసాయ డివిజన్‌లలో హార్టికల్చర్ అధికారులు అందుబాటులో ఉన్నారు. మరిన్ని వివరాలకు బెల్లంపల్లిలో అర్చన (8977713955), భీమినిలోఅరుణ్ (89777 13960 ), మంచిర్యాలలో సహజ (8977713954), చెన్నూర్‌లో ఎం కళ్యాణి (8977713957)లను సంప్రదించవచ్చు.-

 బీ అనిత, జిల్లా ఉద్యాన, పట్టు పరిశ్రమ శాఖ అధికారి, మంచిర్యాల