1. కోనసీమపై పవన్ చేసిన వ్యాఖ్యలపై జడ్చర్చ ఎమ్మెల్యే అనిరుధ్‌రెడ్డి ఫైర్
2. క్షమాపణ చెప్పాల్సిందేనని డిమాండ్
3. దమ్ముంటే టీడీపీని వదిలి పోటీచేయాలని సవాల్
4.   70 ఏళ్లు వచ్చినా సీఎం కాలేడంటూ వ్యాఖ్యలు

హైదరాబాద్, నవంబర్ 29 (విజయక్రాంతి): ఆంధ్రప్రదేశ్ ఉప ముఖ్యమంత్రి, జనసేన అధినేత పవన్ కల్యాణ్ ఇటీవల చేసిన వివాదాస్పద వ్యాఖ్యలు తెలంగాణ రాజకీయాల్లో పెద్ద దుమారాన్నే సృష్టించాయి. గోదావరి జిల్లాల పచ్చదనం వల్లే రాష్ట్రం విడిపోయింది అని, తెలంగాణ నాయకుల నర దిష్టి తాకడం వల్లే గోదావరి జిల్లాల్లో కొబ్బరి చెట్లు ఎండిపోతున్నాయి అని పవన్‌కల్యాణ్ అనడం ఇక్కడి నాయకులకు ఆగ్రహం తెప్పిస్తున్నది.

దీనిపై మహబూబ్‌నగర్ జిల్లా, జడ్చర్ల కాంగ్రెస్ ఎమ్మెల్యే అనిరుధ్‌రెడ్డి మండిపడ్డారు. తెలంగాణ ఎప్పుడూ ఆంధ్రప్రదేశ్ సంక్షేమానికే మద్దతు ఇస్తుందని.. రెండు రాష్ట్రాలు సౌహార్దంతో ఎదగాలని కోరుకుంటుందని చెప్పారు. కానీ ఆంధ్రప్రదేశ్ అభివృద్ధికి తెలంగాణ రాష్ట్ర విభజనే అడ్డంకి అని పవన్ వ్యాఖ్యానించడం అవమానకరమని విమర్శించారు.

‘పవన్ కల్యాణ్ 70 ఏళ్లు వచ్చినా కూడా ముఖ్యమంత్రి కాలేడని, అతన్ని ప్యాకేజ్ స్టార్ అంటారని, దమ్ముంటే తెలుగుదేశం పార్టీని వదిలిపెట్టి ఒంటరిగా పోటీ చేసి గెలవాలని సవాల్ చేశారు. ‘తెలంగాణ వాళ్ల నరదిష్టి తగిలి కోనసీమ కొబ్బరి చెట్లు ఎండిపోయాయని, మొండెం లేకుండా అయ్యాయని పవన్ కల్యాణ్ అంటున్నారు. నిజంగా తెలంగాణ వాళ్లకు నరదిష్టి, ఇతరులు బాగుపడొద్దు అనే ఉద్దేశం ఉంటే.. ఆంధ్ర వాళ్లు ఇక్కడ వ్యాపారాలు చేసుకుంటారా?’ అని అనిరుధ్‌రెడ్డి సూటిగా ప్రశ్నించారు.

ఇరిగేషన్, నిర్మాణ సహా అన్ని రంగాల్లో ఆంధ్ర వాళ్ళు ఉన్నారు. అయినా మేము ఒక్క మాట కూడా అంటున్నామా?’ అని ప్రశ్నించారు. పవన్‌కల్యాణ్ ఆంధ్రకు డిప్యూటీ సీఎం అయ్యాడని, ఉండేది, వ్యాపారం చేసుకునేది మాత్రం తెలంగాణలోనే అని చెప్పారు. ‘మాకు నర దిష్టి ఉంటే హైదరాబాద్‌లో ఎందుకు ఆస్తులు కొంటున్నారు? ఇక్కడ ఉన్నవన్నీ అమ్ముకొని పోయి విజయవాడలో ఉండండి అని సూచించారు.

తాను కూడా పవన్‌కల్యాణ్‌కు అభిమానినేనని అనిరుధ్‌రెడ్డి వెల్లడించారు. ‘ఆయన ఓజీ సినిమా ఫ్లాప్ అయినా కూడా.. ప్రొడ్యూసర్ బతకాలని రూ.800 పెట్టి టికెట్ కొని సినిమా చూశా. కానీ.. పవన్ తప్పు మాట్లాడాడు కాబట్టి తప్పే అంటున్నా’ స్పష్టం చేశారు. తెలంగాణ ప్రజల గురించి లేదా తెలంగాణ ప్రాంతం గురించి తప్పుగా మాట్లాడితే సహించబోమని.. పవన్ కల్యాణ్ భేషరతుగా క్షమాపణలు చెప్పాలని ఎమ్మెల్యే అనిరుధ్‌రెడ్డి డిమాండ్ చేశారు.