ఘనంగా జాతీయ క్రీడ, తెలుగు భాషా దినోత్సవ వేడుకలు

ఆదిలాబాద్, (విజయక్రాంతి): ఆదిలాబాద్ జిల్లా కేంద్రంలోని ప్రభుత్వ గిరిజన సంక్షేమ డిగ్రీ కళాశాలలో జాతీయ క్రీడా దినోత్సవం, తెలుగుభాషా దినోత్సవ వేడుకలు ఘనంగా నిర్వహించారు. జాతీయ క్రీడా దినోత్సవం సందర్భంగా భారత హాకీ దిగ్గజం మేజర్ ధ్యాన్ చంద్ జయంతిని పురస్కరించుకొని ఆయన చిత్రపటానికి కళాశాల ప్రిన్సిపాల్ డాక్టర్ ఎం.శివకృష్ణ, పిడి శ్రీనివాస్, కళాశాల అధ్యాపక బృందం పూలమాలలు వేసి ఘనంగా నివాళులు అర్పించారు.

అదేవిధంగా తెలుగు భాషా దినోత్సవం సందర్భంగా తెలుగు భాషకు విశేష సేవలు అందించిన గిడుగు వెంకట రామమూర్తి పంతులను స్మరించుకున్నారు. సాధారణ ప్రజలకు సులభంగా అర్థమయ్యే వ్యవహారిక తెలుగు భాష అభివృద్ధికి గిడుగు చేసిన కృషిని ఈ సందర్భంగా వివరించారు. క్రీడలు ఆరోగ్యకరమైన శరీరంతో పాటు క్రమశిక్షణతో కూడిన మనసును అందిస్తే, భాష సాహిత్యం జ్ఞానం సంస్కృతి,విలువలను పెంపొందిస్తాయని తెలిపారు.