ఆలేరు నూతన ప్రెస్ క్లబ్ కు షోయబుల్లాఖాన్ ప్రెస్ క్లబ్‌గా నామకరణం

ఆలేరు,(విజయక్రాంతి): ఆలేరు ప్రెస్ క్లబ్‌కు ప్రముఖ స్వాతంత్ర్య సమరయోధుడు, నిర్భయ పాత్రికేయుడు షోయబుల్లాఖాన్ పేరు పెట్టారు. మంగళవారం నిర్వహించిన కార్యక్రమంలో ప్రెస్ క్లబ్‌ను షోయబుల్లాఖాన్ ప్రెస్ క్లబ్ గా నామకరణం చేశారు. పాత్రికేయ రంగానికి, ప్రజాస్వామ్య విలువలకు షోయబుల్లాఖాన్ చేసిన సేవలకు గుర్తుగా ఈ నిర్ణయం తీసుకున్నట్లు నిర్వాహకులు తెలిపారు.

అక్షరమే ఆయుధంగా పోరాటం

షోయబుల్లాఖాన్ నిజాం నిరంకుశ పాలన, రజాకార్ల దురాగతాలను తన కలంతో ధైర్యంగా ఎండగట్టిన పాత్రికేయుడు. హైదరాబాద్ సంస్థానం భారత యూనియన్‌లో విలీనం కావాలని బలంగా వాదిస్తూ తన రచనల ద్వారా ప్రజల్లో చైతన్యం కల్పించారు. ఆయన ‘ఇమ్రోజ్’ అనే ఉర్దూ దినపత్రికకు సంపాదకుడిగా పనిచేస్తూ నిజాం ప్రభుత్వ విధానాలను, రజాకార్ల దమనకాండను విమర్శిస్తూ అనేక కథనాలు, సంపాదకీయాలు రాశారు.

ఆయన రచనల కారణంగా గతంలో పనిచేసిన పత్రికలు కూడా ప్రభుత్వ ఆంక్షలకు గురయ్యాయి. 1920 అక్టోబర్ 17న ఖమ్మం జిల్లా సుబ్రవేడులో జన్మించిన షోయబుల్లాఖాన్ ఉస్మానియా యూనివర్సిటీలో జర్నలిజం విద్యను అభ్యసించారు. చిన్న వయసులోనే పాత్రికేయ వృత్తిలోకి ప్రవేశించి ప్రజా సమస్యలపై నిర్భయంగా గళం వినిపించారు. నిజాం పాలనకు వ్యతిరేకంగా, హైదరాబాద్‌ను భారత యూనియన్‌లో విలీనం చేయాలని ఆయన చేసిన రచనలు అప్పటి పాలకవర్గానికి ఆగ్రహం తెప్పించాయి.

చివరకు 1948 ఆగస్టు 22న రజాకారుల దాడిలో షోయబుల్లాఖాన్ ప్రాణాలు కోల్పోయారు. ఆయన త్యాగం తెలంగాణ చరిత్రలో నిర్భయ పాత్రికేయతకు ప్రతీకగా నిలిచింది. షోయబుల్లాఖాన్ పేరును ఆలేరు ప్రెస్ క్లబ్‌కు పెట్టడం ద్వారా ప్రజల పక్షాన నిలిచే జర్నలిజం, నిజాన్ని నిర్భయంగా చెప్పే పాత్రికేయ విలువలను కొనసాగించాలనే సంకల్పాన్ని చాటినట్లయింది.