ఆకాశంలో ఇంద్రధనస్సు కనువిందు

గణపురం,(విజయక్రాంతి): సోమవారం మధ్యాహ్నం సమయంలో కురిసిన  వర్షానంతరం గణపురం మండలంలో ఆకాశం రంగుల హరివిలాసంతో కళకళలాడింది. వర్షపు చినుకులు తగ్గిన వెంటనే ఆకాశంలో మెరిసిన ఇంద్రధనస్సు స్థానిక ప్రజలను ఆకట్టుకుంది. ఏడు రంగుల సమ్మేళనంతో విరాజిల్లిన ఈ ప్రకృతి అందం చూసిన ప్రతి ఒక్కరూ ఆనందభరితులయ్యారు. గ్రామీణ ప్రాంతాల్లోని పచ్చని పొలాల మధ్య ఆకాశాన్ని అలంకరించిన ఇంద్రధనస్సు ప్రత్యేక ఆకర్షణగా నిలిచింది. చిన్నారుల నుంచి పెద్దల వరకు అందరూ బయటకు వచ్చి ఈ అద్భుత దృశ్యాన్ని ఆస్వాదించారు.

కొందరు మొబైల్ ఫోన్లలో ఈ క్షణాలను బంధిస్తూ ఆనందాన్ని పంచుకున్నారు. ప్రకృతి అందాలను ఆస్వాదించే అవకాశాలు అరుదుగా లభిస్తాయని, ఈరోజు కనిపించిన ఇంద్రధనస్సు అలాంటి అరుదైన సందర్భంగా నిలిచిందని స్థానికులు పేర్కొన్నారు. కొద్ది సేపే కనిపించిన ఈ అద్భుత దృశ్యం అందరి హృదయాల్లో మధుర జ్ఞాపకంగా మిగిలిపోయింది. వర్షం తరువాత ఇంద్రధనస్సు కనిపించడం సహజ ప్రక్రియ అయినప్పటికీ, ప్రతిసారి అది చూపించే అందం మాత్రం ఎప్పటికీ కొత్తగానే ఉంటుందని ప్రజలు భావిస్తున్నారు.