Ram Charan కు గాయం! ‘పెద్ది’ షూటింగ్‌లో జరిగిన ఘటన ఇదే!

స్టార్ హీరో రామ్‌చరణ్ ప్రస్తుతం డైరెక్టర్ బుచ్చిబాబు సానా దర్శకత్వంలో ‘పెద్ది’ సినిమాలో నటిస్తున్న సంగతి తెలిసిందే. ఈ భారీ స్పోర్ట్స్ డ్రామా షూటింగ్ ప్రస్తుతం హైదరాబాద్‌లో జరుగుతోంది. తాజాగా ఈ సినిమా షూటింగ్‌లో రామ్‌చరణ్‌కు స్వల్ప గాయాలయ్యాయి.

ఆయన కంటి దగ్గర దెబ్బ తలిగినట్టు సమాచారం. దీంతో మెగా ఫ్యాన్స్ ఆందోళనకు గురయ్యారు. ఈ విషయంపై చరణ్ టీమ్ స్పందించింది. ‘చరణ్ కంటికి ఏమీ కాలేదు. దెబ్బ కంటిపైన కనుబొమ్మ పక్కన తగిలింది. నాలుగు కుట్లు పడ్డాయి. ఎవరూ భయపడాల్సిన పనిలేదు’ అని స్పష్టం చేశారు.

షూటింగ్‌కు ఎక్కడా బ్రేక్ ఇవ్వకుండా బుధవారం కూడా సెట్స్‌కు హాజరయ్యారని చిత్రవర్గాలు తెలిపాయి. దీంతో అభిమానులు కాస్త ఊపిరి పీల్చుకుంటున్నారు. జాన్వీకపూర్ హీరోయిన్‌గా నటిస్తున్న ఈ చిత్రాన్ని మైత్రీ మూవీ మేకర్స్ బ్యానర్‌పై నవీన్ యెర్నేని, రవిశంకర్ నిర్మిస్తున్నారు. ఏఆర్ రెహమాన్ సంగీతం అందిస్తున్న ఈ సినిమా ఏప్రిల్ 30న విడుదల కానుంది.