29-11-2025 07:45:18 PM
హనుమకొండ,(విజయక్రాంతి): ఆర్ఎస్ఎస్ సీనియర్ నేత రేవా కోటేశ్వరరావు (85) వయోభారంతో వరంగల్ డాక్టర్స్ కాలనీలోని స్వగృహంలో కన్నుమూశారు. వరంగల్ జిల్లాలో రాష్ట్రీయ స్వయం సేవక సంఘ విస్తరణ కోసం ఆంధ్ర ప్రాంతం నుండి 65 సంవత్సరాల క్రితం ఆయన వచ్చారు. స్థానిక మహబూబియా హైస్కూల్లో హిందీ పండిట్ గా పనిచేస్తూ ఇక్కడ స్థిరపడ్డారు. మొదట్లో సూర్యాపేటలో ఆర్ఎస్ఎస్ ప్రచారక్ గా పనిచేసి,ఆ తర్వాత వరంగల్ జిల్లా ఆర్ఎస్ఎస్ కార్యవాహ గా, బౌద్ధిక్ ప్రముఖ్ గా, విభాగ్ కార్యవాహగా, విభాగ్ సంఘచాలక్ గా, ప్రాంత సహ కార్యవాహగా, ప్రాంత కార్యకారిణి సభ్యులుగా పనిచేశారు.
శనివారం సాయంత్రం పాఠశాల నుండి నేరుగా గ్రామాలకు పర్యటనకు వెళ్లి అక్కడి శాఖల్లో పాల్గొని తిరిగి సోమవారం ఉదయం పాఠశాలకు వచ్చేవారు. 1975లో ఇందిర ప్రభుత్వం విధించిన ఎమర్జెన్సీకి వ్యతిరేకంగా ఆయన వరంగల్ జిల్లాలో అజ్ఞాతంలో ఉండి పలు ఉద్యమాలను నిర్వహించారు. అదేవిధంగా వరంగల్, కరీంనగర్, ఖమ్మం, నల్గొండ జిల్లాలో జరిగిన రామ జన్మభూమి ఉద్యమంలో ప్రధాన భూమిక పోషించారు. ఆయన మృతికి ఆర్ఎస్ఎస్ వరంగల్ విభాగ్ సంఘ చాలక్ ప్రొఫెసర్ చిలకమారి సంజీవ, కార్యవాహ ప్రొఫెసర్ గద్దె రమేష్ సంతాపం తెలిపారు.