జోధ్‌పూర్: కేంద్ర ప్రభుత్వం సోనమ్ వాంగ్‌చుక్(Sonam Wangchuk released) నిర్బంధాన్ని తక్షణమే రద్దు చేయాలని నిర్ణయించడంతో శనివారం జోధ్‌పూర్ కేంద్ర కారాగారం(Jodhpur jail) నుండి విడుదలయ్యారు. గత సంవత్సరం సెప్టెంబర్ 26న లేహ్ జిల్లా మేజిస్ట్రేట్ జారీ చేసిన ఆదేశాల మేరకు వాంగ్‌చుక్‌ను జాతీయ భద్రతా చట్టం (National Security Act) కింద నిర్బంధించారు. ఈ చట్టం కింద నిర్దేశించిన నిర్బంధ కాలంలో దాదాపు సగభాగం కాలాన్ని ఆయన ఇప్పటికే పూర్తి చేశారు. కేంద్ర ప్రభుత్వ ఆదేశాల మేరకు, ఈరోజు మధ్యాహ్నం సుమారు 1:30 గంటలకు ఆయన జైలు నుండి విడుదలయ్యారని రతనాడ పోలీస్ స్టేషన్ ఎస్ హెచ్ఓ దినేష్ లఖావత్ తెలిపారు. 

అతని భార్య, గీతాంజలి అంగ్మో, లాంఛనాలను పూర్తి చేయడానికి జైలుకు వచ్చినట్లు అధికారులు తెలిపారు. లడఖ్‌కు రాష్ట్ర హోదా కల్పించాలని, రాజ్యాంగంలోని ఆరవ షెడ్యూల్‌లో దానిని చేర్చాలని కోరుతూ జరిగిన నిరసనలు లేహ్‌ను ఉర్రూతలూగించిన రెండు రోజుల తర్వాత 2025 సెప్టెంబర్ 26న వాంగ్‌చుక్‌ను(Sonam Wangchuk) నిర్బంధించారు. నిరసనల్లో 22 మంది పోలీసులతో సహా 45 మందికి పైగా గాయపడ్డారు. ప్రజా శాంతిని పరిరక్షించే ఉద్దేశంతో లేహ్ జిల్లా మేజిస్ట్రేట్ ఆదేశాల మేరకు జాతీయ భద్రతా చట్టం కింద అతన్ని నిర్బంధించి ఆ తర్వాత జోధ్‌పూర్ జైలుకు తరలించారు.

సోనమ్ వాంగ్‌చుక్ నిర్బంధాన్ని ప్రభుత్వం ఎత్తివేయడంపై పీడీపీ అధినేత్రి మెహబూబా ముఫ్తీ(PDP chief Mehbooba Mufti) స్పందిస్తూ "సోనమ్ వాంగ్‌చుక్‌పై జాతీయ భద్రతా చట్టాన్ని ప్రయోగించి ఉండకూడదు. పర్యావరణ పరిరక్షణ కోసం సోనమ్ వాంగ్‌చుక్ ఎంతో కృషి చేశారు. ఆయన్ని మరీ ఎక్కువ కాలం జైలులో ఉంచడం చాలా తప్పు" అని మెహబూబా ముఫ్తీ  పేర్కొన్నారు.