సిరిసిల్ల మినీ స్టేడియం వేదిక కానున్నది

రాజన్న సిరిసిల్ల,(విజయక్రాంతి): ధార్మిక కార్మిక క్షేత్రమైన సిరిసిల్లాలో 8వ రాష్ట్ర జూనియర్ వాలీబాల్ బాలబాలిక క్రీడోత్సవాలు సిరిసిల్ల చేన్నమనేని వెంకట్రావు సర్దేశాయి మినీ స్టేడియంలో నిర్వహించేందుకు అన్ని ఏర్పాట్లు చేశారు. రేపటి నుండి అట్టహాసంగా ప్రారంభం కానున్న ఈ వాలీబాల్ క్రీడలకు జిల్లా వాలీబాల్ అసోసియేషన్ ఆధ్వర్యంలో ఏర్పాటు పూర్తయ్యాయి. మినీ స్టేడియంలో  ఇప్పటికే నాలుగు కోర్టులు అంతర్జాతీయ స్థాయిలో ఏర్పాట్లు చేశారు.

తెలంగాణలోని పాత పది జిల్లాల నుండి క్రీడాకారులు ఈ క్రీడోత్సవంలో పాల్గొంటుండగా ఇప్పటికే క్రీడాకారులు మినీ స్టేడియానికి తరలివస్తున్నారు. సుమారు 500 మంది క్రీడాకారులతో జరిగే ఈ క్రీడోత్సవాలకు ఏర్పాట్లు పూర్తయ్యాయి. డే అండ్ నైట్ క్రీడా పోటీలు జరిగేలా లైటింగ్ సౌకర్యం ఏర్పాటు చేశారు.వివిధ జిల్లాల నుండి విచ్చేసిన విద్యార్థులకు వసతి సౌకర్యంతో పాటు భోజన సౌకర్యం ఉదయం అల్పాహారం అందించేందుకు ఏర్పాటు చేశారు. అత్యంత ఉత్సాహంగా జరిగే ఈ క్రీడోత్సవాలను తిలకించేందుకు రాజన్న సిరిసిల్ల జిల్లా నుండి ప్రజలు భారీగా తరలిరావాలని వాలీబాల్ అసోసియేషన్ జిల్లా అధ్యక్షుడు చెన్నమనేని శ్రీ కుమార్ పిలుపునిచ్చారు.