మాజీ ఎమ్మెల్యే బాజిరెడ్డి గోవర్ధన్..

బాన్సువాడ (విజయక్రాంతి): తెలంగాణ రాష్ట్ర సాధన కలను సాకారం చేసిన ఘనత పూర్తిగా కేసీఆర్‌దేనాని మాజీ ఎమ్మెల్యే బాజిరెడ్డి గోవర్ధన్ అన్నారు. దీక్షా దివస్ సందర్భంగా కామారెడ్డి జిల్లా బాన్సువాడ అంబేద్కర్ చౌరస్తాలో నిర్వహించిన సమావేశంలో ఆయన మాట్లాడుతూ, “కేసీఆర్ లేకుంటే తెలంగాణ లేదు” అని గుర్తుచేశారు. అంతకుముందు బీఆర్ఎస్ కార్యకర్తలతో కలసి ర్యాలీగా వెళ్లి అమరవీరుల స్తూపానికి నివాళులర్పించారు. ఈ సందర్భంగా బాజిరెడ్డి మాట్లాడుతూ బీఆర్ఎస్ పది ఏళ్ల పాలన రాష్ట్రాన్ని దేశంలో అగ్రస్థానానికి తీసుకెళ్లిందని, ప్రస్తుత కాంగ్రెస్ ప్రభుత్వం అన్ని విధాలా విఫలమైందని అన్నారు.

రేవంత్ రెడ్డి ప్రభుత్వం అమలుకాని హామీలు మాత్రమే ఇచ్చి ప్రజలను నిరాశపర్చిందని విమర్శించారు.బాన్సువాడకు కేసీఆర్ అత్యధిక నిధులు కేటాయించారని, ఇకపై బీఆర్ఎస్ ప్రభుత్వమే ప్రజలు కోరుకుంటున్నారని తెలిపారు. ప్రస్తుత ప్రభుత్వం రెండు సంవత్సరాల్లోనే రూ. 2.50 లక్షల కోట్ల అప్పులు చేసిందని ఆరోపించారు. అనంతరం ఉద్యమకారులకు శాలువ పూలమాలతో ఘనంగా సన్మానించారు. ఈ కార్యక్రమంలో అంజిరెడ్డి, జుబేర్, మోచి గణేష్, సాయిబాబా, రమేష్ యాదవ్, నాయిని మొగులయ్య, బోడ చందర్, శివసూరి, గౌస్ తదితరులు పాల్గొన్నారు.