నక్సలైట్లు అమర్చిన ఐఈడీ పేలి యువకుడికి గాయాలు

బీజాపూర్: ఛత్తీస్‌గఢ్‌లోని బీజాపూర్ జిల్లాలో నక్సలైట్లు అమర్చిన ఇంప్రూవైజ్డ్ ఎక్స్‌ప్లోజివ్ డివైస్ (Improvised Explosive Device) పేలడంతో 16 ఏళ్ల బాలుడు గాయపడ్డాడని పోలీసులు ఆదివారం తెలిపారు. భోపాల్‌పట్నం పోలీస్ స్టేషన్ పరిధిలోని కొండపడ్గు గ్రామానికి చెందిన బాధితుడు శనివారం సాయంత్రం పశువులను మేపడానికి సమీపంలోని అడవిలోకి వెళ్లినప్పుడు ఈ పేలుడు సంభవించిందని తెలిపారు.బాలుడు అనుకోకుండా ఐఈడిని తాకాడంతో అది పేలి అతని కాళ్లకు గాయాలయ్యాయని అధికారులు వెల్లడించారు.

బాలుడిని బీజాపూర్ జిల్లా ఆసుపత్రిలో చేర్పించి చికిత్స అందిస్తున్నారు. అడవుల్లో నక్సల్ వ్యతిరేక కార్యకలాపాల సమయంలో ఈ మార్గాలను ఉపయోగించే భద్రతా సిబ్బందిని లక్ష్యంగా చేసుకోవడానికి మావోయిస్టులు తరచుగా మట్టి ట్రాక్‌లపై ఐఈడిలను అమర్చుతారని చెప్పారు. బస్తర్ ప్రాంతంలో గతంలో అల్ట్రాలు వేసిన ఇటువంటి ఉచ్చులకు పౌరులు బలైపోయారని పోలీసులు తెలిపారు.

అటవీ ప్రాంతాలను సందర్శించేటప్పుడు జాగ్రత్తగా ఉండాలని, ఏదైనా అనుమానాస్పద వస్తువులు లేదా కార్యకలాపాల గురించి వెంటనే పోలీస్ స్టేషన్, సమీపంలోని భద్రతా శిబిరానికి తెలియజేయాలని పోలీసులు ప్రజలకు విజ్ఞప్తి చేశారు. జూలై 13న బీజాపూర్‌లోని మద్దేడ్ ప్రాంతంలో జరిగిన ఇలాంటి సంఘటనలో ఒక మైనర్ బాలికతో సహా ముగ్గురు వ్యక్తులు గాయపడ్డారు. ఈ ఏడాది ఇప్పటివరకు బీజాపూర్‌తో సహా ఏడు జిల్లాలతో కూడిన బస్తర్ ప్రాంతంలో మావోయిస్టు హింసలో దాదాపు 25 మంది ప్రాణాలు కోల్పోయారు.