హైదరాబాద్: ఖమ్మం జిల్లాలోని కొణిజర్ల మండలం తనికెళ్ల సమీపంలో టీజీఆర్టీసీ(Telangana State Road Transport Corporation )కి చెందిన ఇంద్ర బస్సు బోల్తా పడి పలువురు గాయపడ్డారు. సత్తుపల్లి డిపోకు చెందిన బస్సు హైదరాబాద్ నుండి సత్తుపల్లికి వెళుతుండగా ఈ సంఘటన జరిగింది. ఆర్టీసీ బస్సు డ్రైవర్ ఎదురుగా వస్తున్న వాహనాన్ని తప్పించబోయేందుకు ప్రయత్నించడంతో ప్రమాదవశాత్తు బస్సు పల్టీ కొట్టింది. ప్రమాదం జరిగినప్పుడు బస్సులో 12 మంది ప్రయాణికులు ఉన్నారు. బస్సు అద్దాలు విరిగిపోయాయి. పోలీసులు, ఆర్టీసీ అధికారులు సంఘటనా స్థలానికి చేరుకుని క్షతగాత్రులను చికిత్స కోసం ఖమ్మంలోని ప్రభుత్వ జనరల్ ఆసుపత్రికి తరలించారు. ముగ్గురు తీవ్రంగా గాయపడ్డారని పోలీసులు చెబుతున్నారు. ఈ సంఘటనపై రెవెన్యూ మంత్రి పొంగులేటి శ్రీనివాస్ రెడ్డి(Revenue Minister Ponguleti Srinivas Reddy ) విచారం వ్యక్తం చేశారు. గాయపడిన వారికి మెరుగైన చికిత్స అందించాలని అధికారులను ఆదేశించారు.