అమృతస్వరూపిణి

అమ్మ అనగానే

అక్షరాలకు ప్రాణం వస్తుంది,

మాటలకు మాధుర్యం 

చేరుతుంది,

మనసులకు 

మమకారం 

అంటుకుంటుంది ॥

పసిబిడ్డ పలుకులలో

అమ్మనే ప్రథమ స్వరం,

పదం పలకకముందే

ప్రేమను పంచే దైవం ॥

నిద్రలేని రాత్రుల్లో

నెత్తిన వేళ్లతో వెన్నెల వెదజల్లే 

శివశేఖరం,

కన్నీటి చినుకుల్లో కన్నుల్ని తుడిచే 

కరుణాసాగర తరంగం॥

ఆమె చేతుల్లోనే

జీవితపు మొదటి అక్షరాభ్యాసం,

ఆమె చూపుల్లోనే

ప్రపంచమంతా పరిమళించే 

సౌందర్యం ॥

అమ్మ ఒక మాట కాదు

అద్భుతమైన ఒక మంత్రం...

ఆమె ఒక మనిషి కాదు

అమూల్యమైన 

ఒక సత్త్వం ॥

మాతృ దినోత్సవం 

ఒక రోజే కాదు

ప్రతి రోజు ఆమె 

పాదాల పూజే కావాలి,

ప్రతి శ్వాసలో ఆమె స్మరణే ఉండాలి,

ప్రతి విజయానికి 

ఆమె కేంద్రం కావాలి ॥

గుండ్లపల్లి 

రాజేంద్రప్రసాద్