సినిమా ఇండస్ట్రీలో కొందరికి కష్టంగా, మరికొందరికి సులభంగా అవకాశాలు వస్తుంటాయి. ఇంకొంత మంది అదృష్టవంతులకు చాలా విచిత్రంగా అవకాశాలు తమ తలుపు తడతాయి. ‘ఉప్పెన’ బ్యూటీ కృతిశెట్టికి కూడా హీరోయిన్‌గా తొలి అవకాశం అనూహ్యంగా వచ్చిందట. ఇందుకు కారణం తన తండ్రి ఆలస్యంగా రావడమే అని చెబుతోందీ బ్యూటీ. ఈ భామ తమిళంలో నటించిన తాజాచిత్రాలు ‘వా వాతియార్’, ‘ఎల్‌ఐకే ఇన్సూరెన్స్ కంపెనీ’.

ఈ రెండు సినిమాలు త్వరలోనే ప్రేక్షకుల ముందుకు రానున్నాయి. ఇందులో కార్తి హీరోగా నటిస్తున్న ‘వా వాతియార్’ తెలుగులో ‘అన్నగారు వస్తారు’ పేరు విడుదల కానుంది. ఈ నేపథ్యంలోనే ఓ ఇంటర్వ్యూలో పాల్గొన్న కృతిశెట్టి తన సినిమా కెరీర్ ప్రారంభమైన తీరు గురించి ఆసక్తికర విషయాలను పంచుకుంది. “నేను తొలుత ఒక వాణిజ్య ప్రకటన కోసం ఆడిషన్ ఇవ్వడానికి వెళ్లాను. ఆడిషన్ పూర్తయిన తర్వాత నన్ను తీసుకెళ్లడానికి డాడీ వస్తా అన్నాడు.

కానీ, ఆయన రావడం కొంచెం ఆలస్యమైంది. దీంతో నేను పక్కనే ఉన్న స్టూడియోకు వెళ్లాను. అక్కడ కూడా ఏవో ఆడిషన్స్ జరుగుతున్నాయి. అక్కడ వాళ్లు నన్ను చూసి ‘మీకు సినిమాల్లో నటించే ఆసక్తి ఉందా..’ అని అడిగారు. ఏం చెప్పాలో తెలియక వాళ్లకు మా అమ్మ నంబర్ ఇచ్చి వచ్చాను. తర్వాత వాళ్లు అమ్మకు కాల్ చేయ డం.. సినిమాలో ఓకే కావడం చకచకా జరిగిపోయాయి.

అలా దర్శకుడు బుచ్చి బాబు రూపొందించిన ‘ఉప్పెన’ సినిమాలో హీరోయిన్‌గా ఎంపికయ్యాను” అని తెలిపింది. అలా ‘ఉప్పెన’తో తన కెరీర్‌ను విజయవంతంగా ప్రారంభించిన ఈ ముద్దుగుమ్మ ఆ తర్వాత ఒక్క హిట్ కూడా అందుకోలేపోయింది. ఇప్పుడు చాలా కాలం తర్వాత తమిళ ఇండస్ట్రీలో రెండు పెద్ద సినిమాలు చేస్తోంది. మరి కృతిశెట్టికి ఈ సినిమాలైనా మంచి ఫలితాన్ని అందించాలని ఆశిద్దాం.