జిల్లా కలెక్టర్ బి. ఎం. సంతోష్

గద్వాల (విజయక్రాంతి): ప్రజలకు, ప్రభుత్వానికి అనుసంధానకర్తలుగా ఉండే జర్నలిస్టులు సమాజ అభివృద్ధిలో ముఖ్యమైన పాత్ర పోషిస్తారని, ప్రజాస్వామ్య మనుగడకు మీడియా పాత్ర ఎంతో కీలకమని జిల్లా కలెక్టర్ బి. ఎం. సంతోష్ అన్నారు. ఆదివారం గద్వాలలోని వజ్రా అభినందన్ బ్యాంకిట్ హాల్లో తెలంగాణ స్టేట్ యూనియన్ ఆఫ్ వర్కింగ్ జర్నలిస్ట్ల (టీయుడబ్ల్యూజే) జిల్లా నాలుగవ మహాసభలకు ఎస్పీ శ్రీనివాస్ రావుతో కలిసి కలెక్టర్ విశిష్ట అతిథిగా పాల్గొన్నారు. ఈ సందర్భంగా కలెక్టర్ మాట్లాడుతూ ప్రజాస్వామ్య వ్యవస్థలో నాలుగో స్తంభంగా ఉన్న మీడియా విశ్వసనీయ వార్తలతో ప్రజల ఆదరాభిమానాలు చూరగొనాలని ఆకాంక్షించారు.

జర్నలిస్టులు ప్రజలకు ఉపయోగపడే వార్తలు రాయడం వలన ప్రభుత్వ యంత్రాంగం కూడా వాటిపై స్పందించి తగు చర్యలు తీసుకోవడానికి అవకాశం ఉంటుందన్నారు. ఏదైనా ఒక విషయాన్ని వక్రీకరించి రాస్తే ప్రజల నమ్మకాన్ని కోల్పోవాల్సి వస్తుందని, నిజాలను రాసినప్పుడే మీడియాకు గౌరవం ఉంటుందన్నారు. తాను యుపిఎస్సి పరీక్షలకు సాధన చేసేటప్పుడు ప్రతిరోజు ఉదయాన్నే న్యూస్ పేపర్స్ చదవడం వలన తన వ్యక్తిత్వాన్ని, ఆలోచన విధానాన్ని మెరుగుపరచుకోవడానికి అవకాశం ఏర్పడిందన్నారు. ప్రతినిత్యం పత్రికల్లో వచ్చే ముఖ్యమైన అంశాలను నోట్ చేసుకోవడం వలన పోటీ పరీక్షల్లో అడిగే కరెంట్ అఫైర్స్ లో ఎక్కువ మార్కులు తెచ్చుకోవచ్చని పేర్కొన్నారు.

టియుడబ్ల్యూజే ఆధ్వర్యంలో జర్నలిస్టులకు వివిధ సందర్భాల్లో సెమినార్లు, శిక్షణ తరగతులు నిర్వహించడం అభినందనీయమని, ఫలితంగా జర్నలిస్టులు తమ వృత్తిలో మరింత ప్రతిభ చాటుతారు అన్నారు. ప్రభుత్వ నిబంధనల ప్రకారం అర్హులైన జర్నలిస్టులకు అక్రిడేషన్ కార్డులు ఇవ్వడం జరుగుతుందని పేర్కొన్నారు. వర్కింగ్ జర్నలిస్టులందరికీ ఇళ్ల స్థలాలు ఇచ్చేందుకు కృషి చేస్తామని, ఆమోదయోగ్యమైన ఇతర డిమాండ్లను పరిష్కరించేందుకు నిబంధనల ప్రకారం ముందుకు వెళ్తామన్నారు. జర్నలిస్టులకు ఏ సమస్య వచ్చిన పరిష్కరిస్తామని, వారి విలువైన సేవలు భవిష్యత్తులోనూ ప్రజలకు అందేలా కృషి చేస్తామని కలెక్టర్ పేర్కొన్నారు.

విలువలతో కూడిన జర్నలిజం సమాజానికి మేలు చేస్తుంది.... టియుడబ్ల్యూజే రాష్ట్ర అధ్యక్షులు విరహత్ అలీ 

విలువలతో కూడిన జర్నలిజం సమాజానికి మేలు చేస్తుందని, ఫలితంగా ప్రజల్లో విలేకరులకు గౌరవం పెరుగుతుందని టియుడబ్ల్యూజే రాష్ట్ర అధ్యక్షులు విరహత్ అలీ అన్నారు.. సోషల్ మీడియా విస్తృతమైనప్పటికీ నిజాలను రాసే వారికే విలువ ఉంటుందని పేర్కొన్నారు. జోగులాంబ గద్వాల జిల్లా ప్రజలు ఎంతో చైతన్యవంతులని, ఇక్కడి జర్నలిస్టులు సైతం ప్రజలకు మేలు చేసే వార్తా కథనాలు రాస్తూ బాధ్యతాయుతంగా పనిచేయడం సంతోషకరమన్నారు. వర్కింగ్ జర్నలిస్టుల హక్కులు కాపాడేందుకు, ఐక్యతగా ఉండేందుకు తమ సంఘం ఎన్నో ఏళ్లుగా పని చేస్తోందన్నారు. ప్రభుత్వం అర్హులైన వారికే అక్రిడేషన్ కార్డులు ఇవ్వాలని, జర్నలిస్టుల వెల్ఫేర్ కమిటీలను పునరుద్ధరించాలని కోరారు. ఈ మహాసభల్లో టీయూడబ్ల్యూజే రాష్ట్ర ప్రధాన కార్యదర్శి రామ్ నారాయణ, మధు గౌడ్, శ్యామ్, బాలస్వామి, కన్నయ్య, ప్రశాంత్, జిల్లా అధ్యక్షుడు రవీందర్ రెడ్డి, ప్రధాన కార్యదర్శి రామకృష్ణ, ఇతర సభ్యులు, తదితరులు పాల్గొన్నారు.