1. రామప్పను సందర్శించిన కరీంనగర్ ఎస్పీఆర్ పాఠశాల విద్యార్థులు
2. ఆలయ చరిత్రను తెలుసుకొని ఆశ్చర్యం వ్యక్తం చేసిన పిల్లలు
3. చరిత్రపై అవగాహన పెరుగుతుందన్న ఉపాధ్యాయులు
4. కట్టడాలు గూర్చి వివరించిన టూరిజం గైడ్ వెంకటేష్

వెంకటాపూర్(రామప్ప), నవంబర్ 29 (విజయక్రాంతి): ములు గు జిల్లా వెంకటపూర్ మండలంలోని ప్రపంచ ప్రఖ్యాత గాంచిన యునెస్కో గుర్తింపు పొందిన రామప్ప దేవాలయంలో శనివారం విద్యార్థుల సందడి నెలకొంది. కరీంనగర్ ఎస్పీఆర్ పాఠశాల నుంచి రామప్ప సందర్శనకు రాగా.. విద్యార్థులకు ఆలయ చరిత్ర, శిల్పకళా వైభవం, కట్టడ నిర్మాణ విశిష్టతలను గుర్తు చేస్తూ టూరిజం గైడ్ తాడబోయిన వెంకటేష్ ఆసక్తికరంగా వివరించారు.

చాలా శతాబ్దాల క్రితం నిర్మించబడిన రామప్ప దేవాలయం ప్రత్యేకతలు, శిల్పాల లోతైన అర్ధాలు, ఎత్తున నృత్యభంగిమల శిల్పాలు, బ్లాక్ బేసాల్ట్ రాయి చెక్కిన గణపతి విగ్రహం వంటి విషయాలను విద్యార్థులు ఆసక్తిగా విన్నారు. దేవాలయ నిర్మాణంలో ఉపయోగించిన తేలికపాటి ‘ఫ్లోటింగ్ బ్రిక్స్’ గురించి కూడా వెంకటేష్ వివరించగా విద్యార్థులు ఆశ్చర్యంతో స్పందించారు.

రామప్ప చెరువు తీరాన్ని, రామలింగేశ్వర ఆలయం పరిసరాలను విద్యార్థులు సందర్శించారు. ఆలయ గోపురం, గర్భగృహంలోని శిల్పాలు, నర్తకుల ప్రతిమలు చూసి విద్యార్థులు మంత్రముగ్ధులయ్యారు. ఈ సందర్శనం ద్వారా విద్యార్థుల్లో భారతీయ శిల్పకళ, చరిత్రపై అవగాహన పెరుగుతోందని ఉపాధ్యాయులు తెలిపారు.