“శివయ్యని బ్రహ్మదేవుడే మొగలి పువ్వులతో పూజించిన క్షేత్రం.. ఇక్కడి నీటి గుండంలో స్నానంచేస్తే చర్మ వ్యాధులు దూరమవుతాయని భక్తుల ప్రగాఢ విశ్వాసం. శివశివా అంటూ మనసారా తలచుకుంటూ.. జలంతో అభిషేకించినా కోరిన కోర్కికలు తీర్చే భోళాశంకరుడు.. తాను ఉన్న చోటే పుణ్యక్షేత్రం అంటూ జంగమయ్య పూజలందుకుంటు న్నాడు. తెలంగాణలో అతి ప్రాచీన శైవక్షేత్రాల్లో ఝరాసంగం ఒకటి. మంజీరా నదీతీరానా, కేతకీ సంగమేశ్వరుడిగా వెలసిన శివాలయంపై ‘విజయక్రాంతి’ ప్రత్యేక కథనం..”

1. శివుడికి మొగలిపూలాభిషేకం చేసిన బ్రహ్మదేవుడు
2. సంగారెడ్డి జిల్లా ఝరాసంగంలో పురాతన శైవక్షేత్రం

కేతకీ సంగమేశ్వరుడి శివాలయం సంగారెడ్డి జిల్లా జహిరాబాద్‌కు 16 కిలోమీటర్ల దూరంలో ఉన్నది. ఝరాసంగం క్షేత్రంలో శివలింగాన్ని సాక్షాత్తు బ్రహ్మదేవుడు ప్రతిష్టించినట్లు ఇక్కడి స్థల పురాణాల ద్వారా తెలుస్తోంది. కృత యుగంలో సూర్య వంశానికి చెందిన కుపేంద్ర అనే రాజు చర్మవ్యాధితో బాధపడుతూ ఉండేవాడు. తన వ్యాధి నివారణకు రాజు చేసిన ప్రయత్నం విఫలమయ్యింది.

ఒకానొకప్పుడు రాజు ఈ ప్రాంతానికి వచ్చినప్పుడు ఇక్కడున్న కేతకీ వనంలో ఉన్న నీటి గుండంలో స్నానం చేసినపుడు అతనికి పూర్తిగా స్వస్థత చేకూరిందట. అదే రోజు రాత్రి రాజుకి సంగమేశ్వర స్వామి కలలో కనిపించి తానిక్కడ ఉన్నానని, దానిని వెలికి తీసి ఆలయాన్ని నిర్మించమని ఆదేశించాడట. పరమేశ్వరుని ఆదేశం మేరకు రాజు స్వామికి ఆలయాన్ని కట్టించాడట.

అక్కడున్న నీటి కుండాన్ని పుష్కరిణిగా మార్చి, దానికి అష్ట తీర్థమని, అమృత కుండంగా పేరు పెట్టినట్లు ఇక్కడి ఆధారాల ద్వారా అవగతమవుతోంది. గర్భాలయంలోకి చేరుకున్న భక్తులు శ్రీ కేతకీ సంగమేశ్వర స్వామి దివ్య మంగళ లింగ రూపాన్ని దర్శించుకుంటారు.

అపూర్వమైన ఆధ్యాత్మికానందానికి లోనవుతుంటారు. మంజీర నదీతీరంలో వెలసిన ఈ స్వామిని సంగమేశ్వర స్వామి అని పిలుస్తారు. ఈ స్వామిని మొదట బ్రహ్మదేవుడు కేతకీ(మొగలి) పుష్పాలతో పూజించాడట. అందుకనే ఈ స్వామిని కేతకీ సంగమేశ్వర స్వామిగా కొలుస్తారని శిలాశాసనాల ద్వారా తెలుస్తోంది. 

ప్రచారంలో మరో పురాణ గాధ..

స్థల పురాణానికి సంబంధించి మరో పురాణ గాధ ఒకటి ప్రచారంలో ఉంది. పూర్వం కేతకీ అనే అప్సరస ఓ ముని శాపంతో కేతకీ మొగలి వనంగా మారిందట. దీంతో శాప విమోచనాన్ని కోరి ఆమె శివుడి గురించి ఘోర తపస్సు చేయగా ఆమె భక్తికి మెచ్చిన శివుడు ఇక్కడ బాన లింగ రూపంలో వెలిశాడట. ఆ కారణంగా ఆ స్వామి కేతకీ సంగమేశ్వర స్వామిగా పూజాధికాలు అందుకుంటున్నట్లు తెలుస్తోంది.

అలాగే సృష్టి అనంతరం బ్రహ్మదేవుడు శివుడిని కేతకీ పుష్పాలతో ఆరాధించాడట. ఆ కారణంగా ఈ స్వామికి కేతకీసంగమేశ్వర స్వామి అనే పేరొచ్చిందంటారు. ప్రధానాలయానికి వెనుక భాగంలో అమృత కుండం దర్శనమిస్తుంది. ఈ కుండంలో స్నానం చేసే వారి చర్మ రుగ్మతలన్నీ పోతాయని భక్తుల విశ్వాసం. అలాగే కాశీలోని గంగానదిలోని ఓ ఝర ఇక్కడ నీటికుండంలో అంతర్లీనంగా కలుస్తుందంటారు.

ఆ కారణంగా ఈ క్షేత్రాన్ని దక్షిణ కాశీ అని కూడా పిలుస్తారు. ఈ గుండానికి ఉన్న గోడకు ఒక రంధ్రం ఉంది. ప్రతిరోజూ మధ్యాహ్నం గుండంలోని నీటిని ఆ రంధ్రం ద్వారా సగం వరకు వదిలేసి, స్వామివారికి ఒక ఆకులో నైవేధ్యం పెట్టగా అది నీటితోపాటు ఆ రంధ్రం నుంచి వెళ్లిపోతుంది. కాసేపటి తర్వాత మళ్లీ ఆ గుండం స్వచ్ఛమైన నీటితో పూర్తిగా నిండిపోతుంది.

ఘనంగా ఉత్సవాలు

ఈ ఆలయంలో ఏటా మహాశివరాత్రి ఉత్సవాలను అత్యంత ఘనంగా నిర్వహిస్తారు. వేలాది మంది భక్తులు పాల్గొనే ఈ ఉత్సవ శోభ అబ్బురపరుస్తుంది. ఈ దేవాలయంలో అన్నపూజ, తమలపాకులు, చెరుకు ముక్కలతో నిత్య పూజలతో పాటు సోమ, శుక్రవారాలు, ప్రతి అమావాస్య, పౌర్ణమి రోజుల్లో, తొలి ఏకాదశి, శ్రావణ మాసాల్లో ప్రత్యేక పూజలు నిర్వహిస్తుంటారు. ప్రతి సంవత్సరం మహశివరాత్రి సందర్భంగా 9 రోజుల పాటు పెద్దఎత్తున ఉత్సవాలు జరుగుతాయి. కార్తీకమాసంలో పార్వతీ సంగమేశ్వరుల కళ్యాణం వైభవంగా జరుగుతుంది.