అప్పుడు తయారైతడు దివానా!

‘శుభం’ ఫేమ్ హర్షిత్‌రెడ్డి హీరో గా నటిస్తున్న కొత్త సినిమా ‘దీవానా’. ఈ చిత్రాన్ని అర్హ మీడియా, వీ స్టూడియోస్ బ్యానర్లపై వాసుదేవ్ కొప్పినేని, శ్రీదేవి కార్యంపూడి నిర్మిస్తున్నారు. అందమైన ప్రేమకథతో దర్శకుడు శ్రీకాంత్ సంగిశెట్టి రూపొందిస్తున్న ఈ సినిమా ఈ వేవివిలో వినోదం పంచేందుకు సిద్ధమవుతోంది. వాలెంటైన్స్ డేను పురస్కరించుకొని తాజాగా ఈ సినిమా స్టోరీ పోస్టర్‌ను మేకర్స్ గురువారం రిలీజ్ చేశారు.

గాఢమైన ప్రేమలో ఉన్న హీరో తన ప్రేమ గురించి, ప్రేయసి గురించి చెప్తున్న ఈ వీడియో ఆద్యంతం ఆకట్టుకుంటోంది. “లవ్ అనేది కావాలని ఎవడు చేయడు.. అది ఐపోతది అంతే.. ఒక పిచ్చి పిల్ల కోసం దిల్‌లో విల్లా కట్టేస్తాం. ఆ ఒక్క పిల్ల వల్ల జీవితం ఉల్టా పల్టా ఐపోతున్నా గాల్లో తేలుతుంటం, ప్రాణం పెట్టేస్తం, జాన్ ఇచ్చేస్తం.. ఆ వైబే వేరుంటది లే.

లవ్ లైట్‌గా ఉన్నంతవరకే బ్రో ఎవడైనా లవర్ బాయ్.. అదే లవ్ దిల్ మొత్తం నిండిపోతే అప్పుడు తయారైతడు ఒక దివానా, ప్యార్ ఒక కిర్రాక్ నషారా బై, సస్తున్నా మస్తు ఉంటది”.. అంటూ సాగుతోందీ గ్లింప్స్. ఈ చిత్రానికి సంగీతం: ఈశ్వర్ చంద్; డీవోపీ: వంశీ పచ్చిపులుసు; ఎడిటర్; హృషికేశ్ పాస్పల్; ప్రొడక్షన్ డిజైన్: ఝాన్సీ గోజల.