కథానాయకుడు సుహాస్ తాజాగా నటిస్తున్న రొమాంటిక్ కామెడీ ఎంటర్‌టైనర్ ‘ఓ భామ అయ్యో రామ’. మలయాళ ముద్దుగుమ్మ మాళవిక మనోజ్ ఈ చిత్రంతో తెలుగులో కథానాయికగా పరిచయమవుతోంది. రామ్ గోధల దర్శకత్వంలో వీ ఆర్ట్స్ పతాకంపై హరీశ్ నల్ల ఈ చిత్రాన్ని నిర్మిస్తున్నారు. జూలై 11న ఈ సినిమా ప్రేక్షకుల ముందుకు రానుంది.

ఈ సందర్భంగా చిత్ర కథానాయకి మాళవిక మనోజ్ సోమవారం పాత్రికేయులతో ముచ్చటించింది. “ఈ సినిమా కథ వినగానే ఎంతో నచ్చింది. అందులో నచ్చిన అంశాల గురించి ఒక్క వాక్యంలో చెప్పలేను. చాలా విభిన్నంగా అనిపించింది. గతంలో సాధారణ గ్రామీణ అమ్మాయిగా చేశా. ఇందులో నా క్యారెక్టర్ ఎంతో మోడ్రన్‌గా, హైపర్‌గా, ఆటిట్యూడ్‌తో ఉంటుంది.

నా పాత్ర పేరు సత్యభామ. నా వ్యక్తిగత జీవితానికి ఎలాంటి పోలిక లేనిదీ పాత్ర. తెలుగులో నటించడం చాలా ఆనందం అనిపించింది. ఇక్కడి టెక్నిషియన్స్, ఆర్టిస్టుల్లో ఎంతో ప్రొఫెజనలిజం ఉందని గమనించా. తెలుగు రాకపోయినా, భావం అర్థం చేసుకుని నటించా.  నాకు ఈత కొట్టడం రాకపోయినా, షూటింగ్ వాయిదా పడటం ఇష్టంలేక ఓ సన్నివేశంలో స్విమింగ్ చేశాను.

ఎంతో భయమేసింది. ఎప్పుడూ, విభిన్నంగా, సవాల్ విసిరే పాత్రలే చేయాలని ఉంటుంది. ఎందుకంటే, రొటీన్ పాత్రలే చేస్తుంటే.. నాకే కాదు ప్రేక్షకులకూ బోర్ కొడుతుంది. సుహాస్ వెరీ నైస్ పర్సన్. ఎంతో హార్డ్‌వర్క్ చేస్తాడు. సెట్‌లో సినిమా కోసమే మాట్లాడతాడు. పెద్ద టాకింగ్ పర్సన్ కాదు. సినిమా నేపథ్యంతో సంబంధం లేని కుటుంబం నాది. ఫ్యామిలీ సపోర్ట్‌తోనే  నటిస్తున్నా. గర్వంగా ఉంది. నాకు చాలా ఆఫర్లు వచ్చాయి.. నచ్చిన కథలకే ఓకే చెప్తున్నా” అని తెలిపింది.